Steıblkoın: Qazaqstannyń óz krıptovalıýtasy paıda bolady

ASTANA. KAZINFORM – Ulttyq bank «steıblkoın» degen ataýmen óz tsıfrlyq aktıvin shyǵarýdy josparlap otyr.

Ulttyq bank tóraǵasy Tımýr Súleımenov Májilis depýtattarynyń saýalyna joldaǵan jaýapta osyndaı derek aıtqan.

- Qazirgi ýaqytta Ulttyq bank tsıfrlyq aktıvti shyǵarý máselesin pysyqtaýda, onyń negizin Ulttyq banktiń Tsıfrlyq teńgesi (steıblkoın: Krıpto-TsT) qamtamasyz etedi. Ulttyq banktiń Tsıfrlyq teńge krıptoanalogy bul jaǵdaıda tsıfrlyq aktıvtermen mámileler boıynsha esep aıyrysý quraly jáne naryqtyń turaqsyzdyǵy kezeńinde tsıfrlyq aktıvtermen mámileler arasyndaǵy qundy saqtaý quraly rólin atqarady, - dep jazylǵan jaýapta.

Jobany naqty ómirge engizbeı turyp birneshe synaqtan ótkizý josparlanǵan.

- Bastamany iske asyrýdyń naqty modeli naryqqa qatysýshylarmen birge Ulttyq banktiń retteý ortasy negizinde jobany iske qosýdyń ártúrli nusqalaryn testileýden keıin aıqyndalatyn bolady, - deıdi Tımýr Súleımenov.

Eske salsaq, Prezıdent Qasym-Jomart Toqaev Býrabaıda ótken Ulttyq quryltaıda krıptoaıyrbastaý, tsıfrlyq maınıng salalaryn yryqtandyrýdy tapsyrǵan edi.