Stalkıng: Senator Ákimshilik kodekske ózgertýler engizýdi usyndy

ASTANA. KAZINFORM – Senator Janna Asanova áleýmettik jelide jıi baıqalatyn stalkıng qubylysyna oraı Ákimshilik kodekske ózgertýler engizýdi usyndy.

«Qazir problema kóp. Bul negizinen jalpy qoǵamnyń problemasy sııaqty. Jáne de bir zańmen bárin sheshe salýymyz neǵaıbyl. Bizge sanany ózgertý, barlyq ınstıtýttarmen jumys isteý qajet. Jalpy, bul (turmystyq zorlyq-zombylyq – red.) – jan-jaqty, kúrdeli problemalardyń biri. Internet keńistiginiń paıda bolýymen qatar tyń syn-tegeýirinder de shyǵyp jatyr... Áleýmettik jeli máselesin tegin kóterip otyrǵanym joq. Bizde áleýmettik jelide stalkıng (stalkıng — jeke adamnyń nemese toptyń basqa adamdy qadaǵalap, ańdyp júrýi) degen qubylys bar», - dedi ol Ortalyq kommýnıkatsııalar qyzmetindegi dóńgelek ústel barysynda.

Onyń atap ótýinshe, elimizde stalkıng máselesi zańmen rettelmegen. Sondyqtan bul problemaǵa da nazar aýdaryp, Ákimshilik kodekske tıisti ózgertýler engizgen jón.