Sot Bolsonarýdy bılikti basyp almaq boldy dep aıyptady

ASTANA. KAZINFORM — Jaır Bolsonarý 2022 jylǵy saılaýda jeńilgennen keıin áskerı tóńkeris jasaý maqsatynda astyrtyn áreket uıymdastyrǵany úshin kináli dep tanyldy, dep habarlady Kazinform tilshisi VVS-ge silteme jasap.

Joǵarǵy sottyń bes sýdıasynyń úsheýi 70 jastaǵy Bolsonarýdy 2022 jylǵy saılaýda solshyl qarsylasy Lýıs Inasıo Lýla da Sılvaǵa jeńilgennen keıin bılikti saqtap qalýǵa baǵyttalǵan astyrtyn áreketti basqardy dep tapty. Aıta keteıik, Lýla da Sılva qazirgi tańda prezıdent qyzmetin atqaryp otyr.

Sýdıalar Bolsonarý jaqtastary 2023 jylǵy 8 qańtarda úkimet ǵımarattaryn basyp alǵanymen, bul astyrtyn árekettiń áskerı qoldaý taba almaǵanyn anyqtady.

Sýdıalardyń biri Bolsonarýdy aqtap shyqty, al sońǵy sýdıa áli daýys bergen joq. Alaıda, eks-prezıdentti kináli dep taný úshin jaı ǵana kópshilik daýystyń ózi jetkilikti. Endi oǵan ondaǵan jylǵa bas bostandyǵynan aıyrylý qaýpi tónip tur. Úkim juma kúni shyǵarylady.

Sheshýshi daýys sýdıa Karmen Lıýsııaǵa tıesili boldy. Ol Bolsonarýdy barlyq bes aıyp boıynsha kináli dep tanydy: memlekettik tóńkeris uıymdastyrýǵa tyrysý, qarýly qylmystyq uıymdy basqarý, demokratııalyq tártipti kúshpen joıýǵa áreket jasaý jáne 2023 jylǵy 8 qańtarda Brazılıadaǵy ǵımarattarǵa shabýyl kezinde múlikti búldirýge qatysty taǵy eki aıyp.

Buǵan deıin Brazılııanyń eks-prezıdenti Jaır Bolsonarý úıqamaqqa alynǵany habarlanǵan bolatyn.