Solıarııdi paıdalaný qaýipti me

PETROPAVL. KAZINFORM – Keı qyz-kelinshek qystyń ortasynda da terisiniń qońyrqaı tartqanyn qalap, osy maqsatta solıarııdi tańdaıdy. Al ol kún sáýlesindeı bola ala ma? SQO sanıtarııalyq-epıdemıologııalyq baqylaý departamenti kommýnaldyq obektilerdi baqylaý jáne qadaǵalaý bóliminiń jetekshi mamany Aıgúl Mýrtalımova solıarııdiń paıdasy men zııany jaıly aıtyp berdi. 

- Aıgúl Oralqyzy, ár zattyń oń jáne kemshin tusy bolatyny belgili. Solıarııge keler bolsaq, aldymen paıdasyn aıtyp berińizshi...

- Eń aldymen, solıarııge barmas buryn kosmetologpen nemese dermatologpen keńesken jón. Óıtkeni, adamdardyń bárine birdeı ol jaǵa bermeıdi, qarsy kórsetilimder bar.

Kúnge kúıý arqyly áıelder kóp jaǵdaıda teridegi ártúrli kemshilikterdi jasyrady. Alaıda bizdiń óńirde kún vannalaryn jyl boıy ala almaımyz, sondyqtan solıarııdi qoldanýǵa bolady. Onyń eń birinshi paıdasy – aǵzany D dárýmeniniń qajetti dozasymen qamtamasyz etedi, baqyt pen qýanysh gormonyn - serotonın men endorfın óndiredi, sonyń arqasynda adam sharshaý seziminen arylyp, kóńil-kúıi jaqsarady. Solıarııdiń bosańsytatyn, tynyshtandyratyn, bakterııaǵa qarsy jáne eger bezeý bolsa jáne onyń gormonaldyq buzylysqa qatysy bolmasa, terini qalpyna keltiretin áseri bar. Sondaı-aq, terige jaǵymdy tús beredi. 

Ýltrakúlgin sáýle ımmýnıtetti jaqsartady, nátıjesinde JRVI, tumaýmen sırek aýyrasyz.

- Al qandaı keri áseri bar?

- Ýltrakúlgin sáýleler sizde joǵary nemese tómen qysym, bronh demikpesi, týberkýlezdiń belsendi túri, qan aýrýlary, isikter, varıkozdy tamyrlar, qalqansha beziniń aýrýlary bolsa, aýrýdyń órshýine ákelýi múmkin.

Sondyqtan solıarııge únemi jáne baqylaýsyz barýǵa bolmaıtynyn este ustańyz. Ýltrakúlgin sáýle teriniń qaterli isigine, teriniń erte qartaıýyna, qaýipsizdik erejelerin saqtamaǵan jaǵdaıda kúıik alý qaýpi joǵary. Shashty bas kıimmen qorǵamaǵan jaǵdaıda shashqa zaqym keledi, sondaı-aq kózdiń qabynýy jáne kataraktaǵa ákelýi múmkin.

Barlyq artyqshylyqtar men kemshilikterdi, táýekelder men qarsy kórsetilimderdi esepke alyp, solıarııge anda-sanda baryp, jasandy kún energııasyn durys paıdalanǵan jaǵdaıda onyń paıdaly tustary kóp.

- Demek, solıarııge barmas buryn belgili bir daıyndyqtan ótken jón ǵoı?

- Solıarııge alǵash ret barar aldynda mindetti túrde dermatologpen keńesý kerek. Teriniń fototıpin anyqtańyz, soǵan baılanysty usynylǵan seanstar uzaqtyǵyn qatań saqtańyz.

Al teriniń ádemi túsin alý úshin solıarııge barardan bir-eki kún buryn skrabpen durystap jýynǵan jón. Al kirerden 2-3 saǵat buryn taza sýmen shaıynýǵa keńes beremin. 

Solıarıı aǵzaǵa zııan ákelmeýi úshin kózdi qorǵaý kerek. Jaı jumǵan jetkiliksiz, ýltrakúlgin sáýle kózge ótpeýi úshin arnaıy kózildirik kıgen durys.

Birinshi sessııa 3-5 mınýttan bolsa, al qalǵandary 10 mınýttan apaýy kerek. Solıarııge barǵannan keıin kem degende 2 kún úzilis jasaý usynylady. Teriniń birkelki ádemi túsin alǵyńyz kelse, solıarıı kýrsy 8-10 seans bolǵany jón. Bir jarym-eki aıdan keıin ony qaıtalaýǵa bolady.

Solıarııge dezodorant, ıissý jaǵyp, makııaj jasap barýǵa bolmaıdy. Teride jaralar bolsa solıarııden bas tartqan jón.

Sondaı-aq meń, tatýajdy arnaıy qorǵanysh japsyrmamen jabýǵa keńes beremin.

Protsedýradan keıin teri qurǵaıdy, sondyqtan arnaıy ylǵaldandyrǵysh kremderdi qoldaný mańyzdy. Al teri qyzaryp, ýltrakúlgin sáýlelermen belsendirilgen bos radıkaldardyń áserin joıýǵa kómektesetin E dárýmeni bar kosmetıkalyq ónimderdi paıdalanǵan jón.

Solıarııge barǵan kúni joǵalǵan ylǵaldyń ornyn toltyrý úshin kóbirek suıyqtyqty tutyný qajet.

Buǵan deıin SQO-da tumaýdyń qaýipti túrin juqtyrǵandar kóbeıgendigin jazǵan edik.