Soltústik Makedonııadaǵy órtke qatysty on adam ustaldy

ASTANA. KAZINFORM – Sońǵy málimetter oıynsha 59 adam mert bolyp, 155 adam zardap shekken Soltústik Makedonııadaǵy túngi klýbta bolǵan órt boıynsha júrgizilgen tekserý barysynda polıtsııa 10 adamdy ustady, dep habarlaıdy BBC.

Órt senbiden jeksenbige qaraǵan túni jergilikti ýaqyt boıynsha saǵat 2:30-da Kochanı qalasyndaǵy Pulse klýbynda bolǵan. Onda jergilikti tanymal DNK tobynyń kontsertine 500-ge jýyq adam jınalǵan.

Aldyn ala málimetter boıynsha, órt pırotehnıkany paıdalanýdyń saldarynan týyndaǵan.

Soltústik Makedonııa Respýblıkasy prokýratýrasynyń ókili Bılıana Arsovska Bı-bı-sı-ge beren suhbatynda klýbqa lıtsenzııa bergen sheneýnikterdi qosa alǵanda qaıǵyly jaǵdaıǵa qatysy bolýy múmkin 10 kúdiktini ustaý týraly qaýly shyǵarylǵanyn habarlady.

Aldynda BAQ ókilderi klýb ıesiniń ustalǵanyn habarlaǵan bolatyn.

Prokýratýra ókili sonymen qatar, klýbta bir ǵana shyǵatyn jer bolǵanyn, ǵımarattyń artyndaǵy esiktiń qulyptalyp turǵanyn, soǵan qaraı ony paıdalaný múmkin bolmaǵanyn jetkizdi.

Sondaı-aq órt bolǵan jerge júrgizilgen alǵashqy tekserý kezinde birneshe túsiniksiz jaǵdaı anyqtalǵan.

- Órt sóndirý jáne naızaǵaıdan qorǵaý júıesinde kemshilikter boldy, - dedi prokýratýra ókili Bı-bı-sı Newshour baǵdarlamasynyń efırinde.

Arsovska sonymen qatar sol kúni kontsert qoıǵan DNK tobynyń bir ǵana múshesi aman qalǵanyn aıtty jáne ol aýrýhana jatyr. Toptyń qalǵan músheleri mert boldy.

Osyǵan deıin Soltústik Makedonııada túngi klýbtaǵy órtten 51 adam kóz jumǵany týraly jazdyq.

Memleket basshysy Soltústik Makedonııa Prezıdentine kóńil aıtý jedelhatyn joldady.