Soltústik Qazaqstannan on aıda 21 myń adam kóship ketken
PETROPAVL. KAZINFORM – Soltústik Qazaqstan oblysynan bıylǵy on aı ishinde 21 304 adam ketken, kelgender sany qonys aýdarǵandardyń ornyn toltyrmaıdy. Saldarynan óńir halqy taǵy shamamen 5,5 myń adamǵa azaıdy. Mundaı úrdis elimizdiń basqa óńirlerinde de baıqalady.
Ulttyq statıstıka bıýrosynyń málimetinshe, kóshi-qon aıyrymy úlken oblystardyń kóshin Túrkistan bastap tur. Bul óńirden bıylǵy qańtar-qyrkúıek aılarynda 112 143 adam kóship ketken. Kelgender sany – 91 myńǵa jýyq. Aıyrmashylyq – 21 myńnan asady.
Ekinshi orynda – Jambyl aýdany. Bul óńirden osy aralyqta 55 500-ge jýyq adam kóship ketse, 43 myń adam qonys aýdarǵan. Oblys halqy 12 500 adamǵa azaıdy.
Jetisý men Qyzylorda oblystarynda da bıylǵy on aıda óńir halqy shamamen 7,5 myń adamǵa azaıyp otyr.
Tek Almaty, Mańǵystaý oblystarynda jáne Astana, Almaty, Shymkent qalalarynda ǵana halyqtyń kóshi-qonynda oń ósim bar.
Máselen, Almaty oblysynan qańtar-qyrkúıekte shamamen 103 500 adam ketse, kerisinshe 106 500-ge jýyq adam kóship kelgen. Mańǵystaýda kóship kelýshiler arqyly halyq sany 1 571 adamǵa ósken.
Halyq sanynyń kóshi-qon arqyly kóbeıýinen Astana qalasy kósh bastap tur. Osy aralyqta 198 myń adam kóship kelse, 143 500-deı adam qonys aýdarǵan.
Almaty halqy 30 myń adamǵa, Shymkent turǵyndary 6,5 myń adamǵa kóbeıdi.
Al jalpy respýblıka boıynsha turǵyndar sany qonys aýdarýshylar esebinen 10 182 turǵynǵa kóbeıdi. Sonyń ishinde TMD elderinen 16 myńnan astam adam kelip, 8 myńǵa jýyq adam kóship ketken. Basqa elderden 4 myńnan astam qonys aýdarsa, 2 300-deı adam shetelge kóshken eken.
Buǵan deıin eńbek kúshi jetispeıtin soltústik óńirlerge halqy tyǵyz ornalasqan ońtústikten turǵyndardy kóshirý máselesine at salysyp júrgen TAUEKEL uıymynyń jetekshisi Býrahan Daqanovtyń pikirin bilgen edik.
