Soltústik Qazaqstan oblysynda sút fermasy salynyp jatyr

PETROPAVL. KAZINFORM — Aýyl sharýashylyǵy mınıstri Aıdarbek Saparov Soltústik Qazaqstan oblysyna jumysy sapary barysynda egin jınaý naýqany jáne 8 000 bas iri qaraǵa arnalǵan sút-taýarly fermasynyń qurylysymen tanysty. Bul týraly vedomstvonyń baspasóz qyzmeti habarlady.

Bıyl barlyq egistik alqapta jazdyq egis jumystary júrgizildi. Atap aıtqanda, dándi jáne dándi-burshaq daqyldary — 2 254 gektardy qamtıdy, sonyń ishinde bıdaı — 1 754 gektar, arpa — 500 gektar, birjyldyq shópter 142 gektarǵa egilgen. Ortasha ónimdilik gektaryna 28 tsentnerdi quraıdy.

Fermerlermen kezdesýde Aıdarbek Saparov sharýashylyqtar jer resýrstaryn tıimdi jáne utymdy paıdalanyp otyrǵanyn atap ótti.

— Búginde zamanaýı tehnologııalardy engizip, turaqty damyp kele jatqan shaǵyn jáne orta sharýashylyqtardy qoldaý óte mańyzdy. Olardyń tabysty qyzmeti — eldiń azyq-túlik qaýipsizdiginiń negizi, — dedi mınıstr.

Jumys sapary barasynda mınıstr Qazaqstandaǵy eń iri agrokásiporyndardyń birine aıaldady. Kásiporyn turaqty túrde joǵary nátıjeler kórsetip keledi. Máselen, astyq daqyldarynyń ónimdiligi gektaryna — 36,9 tsentner, maıly daqyldar — 24,3 ts/ga, mal azyǵy daqyldary — 78,15 ts/ga, kartop — 335,38 ts/ga.

Óndiristik parkte 252 birlik aýyl sharýashylyǵy tehnıkasy bar, onyń ishinde 69 kombaın, 120 traktor jáne 30 egis keshenin atap ótýge bolady. Kompanııa quramyna 7 zamanaýı sút-taýar fermasy kiredi, onda 11 128 bas iri qara mal bar, onyń 4 452-si saýyndy sıyr. Bir sıyrǵa shaqqandaǵy ortasha sút ónimdiligi — 6 320 kg. Bıyl jyl basynan 28 525 tonna sút óndirilgen.

Kásiporyn qazirgi ýaqytta megafermanyń qurylysyn júrgizip jatyr. Bul joba óńirdegi zamanaýı jáne tehnologııalyq turǵydan jetilgen mal sharýashylyǵy kesheni bolmaq.

Aıta ketsek, óńirde 110 sút fermasy jumys isteıdi. Onyń 42-si joǵary tehnologııalyq, avtomattandyrylǵan basqarý júıelerimen jabdyqtalǵan zamanaýı keshender.

Osyǵan deıin elimizde 69 sút fermasy jumys istep turǵandyǵy jóninde jarııaladyq.