Soltústik Qazaqstan oblysy kóktemgi sý tasqynyna daıyndalyp jatyr
PETROPAVL. KAZINFORM – Soltústik Qazaqstan oblysy kóktemgi sý tasqynyna daıyndalyp jatyr. Bıyl 87 eldi mekendi sý basý qaýpi joǵary.
Óńirlik kommýnıkatsııalar qyzmetinde kóktemgi sý tasqynyna daıyndyq barysy aıtyldy. SQO Tótenshe jaǵdaılar departamenti bastyǵy Erik Sarybaevtyń aıtýynsha, vedomstvo 24 qańtardan bastap kúsheıtilgen jumys tártibine kóshti.
«Topyraqtaǵy kúzgi ylǵal kópjyldyq normadan 67 % artyq, qardaǵy sý qory da 147 mm deıin jetedi. Bul óte kóp. Sondyqtan 5 myń turǵyny bar 87 eldi meken baqylaýǵa alyndy. Sý basý qaýpi bar aımaqtardy oblys ákimimen birge aralap, jaǵdaıdy kórdik. Tıisti sharalar qolǵa alynyp jatyr», - deıdi Erik Sarybaev.
Sý tasqynymen kúreske kúsh qurylymdarynan 500-ge jýyq adam, 134 tehnıka daıyn tur. Onyń ishinde turǵyndardy evakýatsııalaýǵa arnalǵan 10 arnaıy mashına, jol tańdamaıtyn 6 kólik, júzý quraldary, motopompalar bar.
«Oblystyq bıýdjetten «KazAvıaSpas» AQ tikushaqtaryn sý tasqyny kezinde paıdalanýǵa 130 mln teńge bólindi. Byltyr zamanaýı ushaqsyz ushý apparaty satyp alyndy, onyń kómegimen kúndelikti monıtorıng jasalyp, qajet bolǵan jaǵdaıda izdeý jumystaryna qoldanylady. Budan bólek taǵy osyndaı 9 apparatty aýdandar satyp aldy. Aıyrtaý, Ǵ.Músirepov atyndaǵy jáne Ýálıhanov aýdandaryndaǵy ózenderde 11 mln teńge muz jarý jumystaryna bólindi, tıisti kelisimsharttar jasaldy», - deıdi departament basshysy.
Jergilikti atqarýshy organdar da kóktemgi sý tasqynyna ázirlenip jatyr. Qajet bolǵan jaǵdaıda 1,5 myń adam kómekke kelmek, osy maqsatqa 1,1 myńnan astam tehnıka daıyndaldy. Jaqynda taǵy 58 motopompa alýǵa qarjy bólindi.
«Qazirgi ýaqytta 87 tonna janar-jaǵar maı, 9 myń tonna ınertti materıal, 38 myń qap ázirlendi. Sý basqan eldi mekenderden evakýatsııalanǵan turǵyndardy ýaqytsha ornalastyrýǵa 242 pýnkt bar. Jyl basynan beri oblys boıynsha 700 myń tekshe metr qar shyǵaryldy. Qardy shyǵarýǵa, joldardy taza ustaýǵa qosymsha qarjy bólinip jatyr, tek aqpan aıynda ǵana 600 mln astam teńge bólindi, bul taǵy 400 myń tekshe metr qar shyǵarýǵa múmkindik berdi», - deıdi Erik Sarybaev.
Vedomstvo basshysy Petropavldaǵy Zarechnyı kenti boıynsha da túsinik berdi.
«Zarechnyı kentiniń shetkeri kóshelerine 2017 jyly sý kirdi. Sodan keıin arnaıy jaldar salynyp, sý joldary jabyldy. Bıyl ony bekitý jáne bıiktetý jumysy júrgiziledi. Oblys ortalyǵy mańyndaǵy saıajaı ýchaskeleri de sý basý aımaǵynda, barlyǵy 5 myń ýchaske, olardy sýdan qorǵaý múmkin emes», - deıdi Erik Sarybaev.
