Soltústik Aral teńizinde sý kólemi artty
ASTANA. KAZINFORM – QR Sý resýrstary jáne ırrıgatsııa mınıstrligi Soltústik Aral teńizindegi sý deńgeıi týraly aqparatpen bólisti.
Vedomstvonyń habarlaýynsha, quramyna Qazaqstan, Qyrǵyzstan, Tájikstan, Túrkimenstan jáne Ózbekstan kiretin memleketaralyq úılestirý sý komıssııasynyń 86-shy otyrysynda taraptar sýarý maýsymynda Soltústik Aralǵa 997 mıllıon tekshe metr sý aǵatyny týraly kelisimge kelgen. Sýdyń aǵyny jylyna keminde 30 tekshe metr bolady. Qazir teńizge sekýndyna 50 tekshe metr sý quıylyp jatyr. Bir jyl buryn aǵyn sekýndyna 6 tekshe metr bolǵan edi.
«Jyl basynan beri Soltústik Aralǵa 1,1 mıllıard tekshe metr sý quıyldy. Osylaısha, búginde Soltústik Araldaǵy sýdyń kólemi 21,4 mıllıard tekshe metr bolyp otyr», - delingen mınıstrlik taratqan habarlamada.
Buǵan deıin Soltústik Araldy ońtústikten bólip turǵan Kókaral bógetiniń qurylysy aıaqtalǵan bolatyn. Bóget Soltústik Aral teńizindegi sý deńgeıin kóterýge múmkindik beretinin atap ótken jón.
Esterińizge salsaq, buǵan deıin Ekologııa jáne tabıǵı resýrstar mınıstri Erlan Nysanbaev Kazinform tilshisine suhbat berip, Aral teńiziniń ahýalymen bólisken edi.
