Slovakııada jańa prezıdent saılandy
Osy jyldyń naýryz-sáýir aılarynda Slovakııada ótken prezıdenttik saılaýdyń ekinshi týrynda el parlamentiniń spıkeri, Hlas partııasynan úmitker Pıter Pellegrını jeńiske jetti, dep habarlaıdy Kazinform TASS agenttigine silteme jasap.
Slovakııadaǵy saılaý ýchaskeleri senbi kúni jergilikti ýaqyt boıynsha saǵat 22:00-de jabyldy. Daýys berý ekinshi týrǵa deıin jalǵasty. Óıtkeni eki apta burynǵy birinshi týrda toǵyz úmitkerdiń eshqaısysy 50 paıyzdan astam daýys jınaı almaǵan.
Baqylaýshylar Pellegrını jeńiske jetedi dep boljaǵanymen, birinshi týrda Slovakııa Syrtqy ister mınıstrliginiń burynǵy basshysy, lıberaldyq oppozıtsııa ókili Ivan Korchok 42,5 paıyzben alǵa shyqty, al Pellegrını 37 paıyz daýys jınaǵan edi.
Ekinshi týrda Pellegrını 53,12 paıyz (1 409 255 daýys) alsa, Korchok 46,87 paıyz (1 243 709 daýys) jınap, ekinshi oryndy ıelendi.
«Men Slovakııa árqashan soǵys emes, beıbitshilik jaǵynda bolýy úshin qolymnan kelgenniń bárin jasaımyn jáne bul úshin bireý meni synǵa alady dep qoryqpaımyn», - dedi Pellegrını.
Pellegrını óziniń qarsylasy Ivan Korchokty aıtarlyqtaı basymdyqpen jeńgenin aıtty. Saıasatker shamamen 5,5 mıllıon halqy bar jáne 4,3 mıllıonnan astam saılaýshysy bar elde 1,4 mıllıonǵa jýyq daýys jınaı aldy.
Aqparat úshin, Slovakııany 2019-2024 jyldar aralyǵynda basqarǵan Zýzana Chapýtova 2023 jyldyń maýsymynda ekinshi merzimge saılaýǵa túspeıtinin málimdegen.
