Skrıptonıttiń týǵan aýyly Atameken bolyp ózgerdi

PAVLODAR. KAZINFORM - Pavlodar qalasynyń irgesindegi Lenın kenti kópshiliktiń qalaýymen Atameken bolyp ataldy. Kentte búginde 10 myńnan asa halyq turady.

Atameken — Pavlodar qalasynyń ákimshilik aýmaǵyna enetin úlken kent.

Jergilikti jurttyń teń jartysy — ózimizdiń qandastarymyz.

Jalpy, eldi meken kópultty bolǵandyqtan ba, onyń ataýyn ózgertý máselesi kópke deıin jergilikti qaýym tarapynan qarsylyqqa ushyraı berdi.

Aýyl aqsaqaldary men bas kóterer azamattary birneshe márte Qazanǵap bıdiń atyn bergisi kelip, usynys jasaǵanymen halqymyzdyń ótken tarıhyn onsha-munsha bilmeıtin jergilikti jurt bul bastamadan úzildi-kesildi bas tartty.

Lenınskıı ataýyn kartadan syzyp tastaýǵa talpynǵan qoǵam belsendileri bıyl jazda kentke 6 túrli nusqa usyndy.

Olar — Qazanǵap, Bıdaıyq, Atameken, Yntymaq, Qazyna jáne Jetinshi aýyl.

Qorytyndy jıynda Qazanǵap bı men Atameken ataýlary qalyp, jergilikti qaýymdastyqtyń 50 múshesiniń 49-y Atamekenge daýys berdi.

Osylaısha halyqtyń qalaýy Atameken bolyp otyr.

— Pavlodar oblysy ákimdiginiń 2023 jylǵy 28 jeltoqsandaǵy № 4 birlesken qaýlysy men Pavlodar oblystyq máslıhatynyń 2023 jylǵy 28 jeltoqsandaǵy № 105/8 sheshimimen Lenın kenti Atameken bolyp qaıta ataldy, — dep habarlady kenttiń ákimdiginen.

Erterekte bul jerde Bıdaıyq degen aýyl bolǵan. Ertis ózeninde kópir joq eski zamanda ózennen arly-berli ótkizetin paromdy kútetin jolaýshylar osy jerde túnep otyrǵan.

Al kent retinde negizi 1914 jyly qalanyp, № 7 aýyl qurylady.

1965 jyly proletarıat kóseminiń esimi berildi. Keńes zamanynan Pavlodar qalasyna qaraıtyn kentke táýelsizdik jyldary aýyldardan kóp otbasylar kóship keldi.

Atameken oblys ortalyǵy úshin geografııalyq turǵydan asa mańyzǵa ıe.

Aıtyp óteıik, Atameken kentinde reseılik shoý-bızneste Skrıptonıt atymen tanymal bolǵan belgili mýzykant Ádil Jálelov dúnıege kelgen.

Al Atamekennen árirek 20 shaqyrym jerdegi Aqsý qalasy — taǵy bir daryndy mýzykant, Gremmı syılyǵynyń ıegeri Imanbek Zeıkenovtiń týǵan mekeni.