SQO joldarynda bıyl 16 adam mert boldy

PETROPAVL. KAZINFORM – Soltústik Qazaqstan oblysyndaǵy jol-kólik oqıǵalarynyń 90% júrgizýshilerdiń kinásinen bolǵan.

Bul týraly SQO Polıtsııa departamenti jergilikti polıtsııa qyzmeti basqarmasynyń bastyǵy Álibek Ǵabdýllın brıfıng barysynda aıtty.

Polkovnıktiń aıtýynsha, jol-kólik oqıǵalarynyń negizgi sebepteri – júrgizýshilerdiń jyldamdyqty shamadan tys asyrýy, qarsy qozǵalys jolaǵyna shyǵý, manevr jasaý erejelerin buzý, sondaı-aq kólik júrgizý mádenıetiniń tómendigi.

– Jyl basynan beri oblys aýmaǵynda 242 jol apaty tirkelip, 16 adam kóz jumdy, 330 adam túrli jaraqat aldy.

Jol-kólik oqıǵalarynyń 89,6% – júrgizýshi kinásinen boldy. Saldarynan 15 adam qaza taýyp, 293 adam jaraqat alǵan.

Jaıaý júrginshilerdi qaǵýdyń 69 jaǵdaıy tirkeldi, 4 adam kóz jumdy.

Balalardyń qatysýymen bolǵan apattar sany – 56, 2 bala mert boldy.

Jol-kólik oqıǵalarynyń 42-si respýblıkalyq mańyzy bar joldarda bolyp, 11 adamnyń ómiri qıyldy.

Al qalalar men eldi mekenderde 4 adam mert bolǵan 189 jaǵdaı tirkeldi, - deıdi Álibek Ǵabdýllın.

Polıtseıdiń aıtýynsha, keı júrgizýshiler kóbirek tabys tabý úshin jolda jarys uıymdastyryp, jolaýshylardyń ómirine qaýip tóndiredi.

– Jol qozǵalysy erejesine sáıkes, eldi mekenderde ruqsat etilgen jyldamdyq – 60 km/saǵ, al avtobýstar úshin – 50 km/saǵ. Bul talapty buzǵandarǵa 5 AEK kóleminde aıyppul salynady, – deıdi Álibek Ǵabdýllın.

Al «Qaýipsiz jol» jedel aldyn alý is-sharasy barysynda Aıyrtaý aýdanynda mas júrgizýshi ustaldy. Ol 15 táýlikke qamalyp, 7 jylǵa kólik júrgizý quqyǵynan aıyryldy.

Buǵan deıin SQO Beskól aýylynyń mańynda júk kóligi soǵyp ketken áıel kóz jumǵanyn jazǵan edik.