SQO-ǵa qonys aýdarýshylarǵa qandaı qoldaý sharalary bar
PETROPAVL. KAZINFORM — Soltústik Qazaqstan oblysyna qonys aýdarýshylarǵa materıaldyq kómekten bólek, birqatar qoldaý sharalary bar.
SQO ákimdiginiń málimetinshe, Eńbek mobıldiligi ortalyǵynda beıimdeý jáne ıntegratsııa bólimi jumys isteıdi. Munda keńes berý, aqparattyq, aýdarma, oqý jáne basqa da beıimdeý qyzmetteri usynylady. Etnıkalyq qazaqtar men olardyń otbasylary qandas mártebesin alǵanǵa deıin 10 kúnge deıin ýaqytsha ornalastyrý ortalyǵynda tegin tura alady.
Qonys aýdarýshylarǵa turǵyn úı satyp alý, salý nemese ıpotekalyq qaryzdy jabý úshin bir rettik aqshalaı kómek; kóship kelý, turǵyn úıdi jalǵa alý jáne kommýnaldyq qyzmetterdi tóleý shyǵyndaryn óteý; jańa mekende jumysqa ornalasýǵa jáne kásipkerlikpen aınalysýǵa járdemdesý; jumys berýshiden suranys bolǵan jaǵdaıda kásibı oqytý sııaqty qoldaý sharalary bar.
Bıylǵy tólemder kólemi:
— kóship kelý úshin — 70 AEK (ár otbasy múshesine 275 240 teńge);
— turǵyn úıdi jalǵa alý jáne kommýnaldyq qyzmetterge — 15–30 AEK aralyǵynda (aı saıyn bir jyl boıy otbasy quramy men ornalasqan jerine baılanysty 58 980–117 960 teńge aralyǵynda);
— ekonomıkalyq mobıldik sertıfıkaty — 1160 AEK (4 561 120 teńge), bul turǵyn úıdiń qunynyń 50%-yn jabady. Qalǵan somany qonys aýdarýshy ózi tóleýi qajet.
Mamandardyń aıtýynsha, sonymen qatar, óńirde jumysqa ornalasý múmkindigi joǵary. Osy jyldyń tamyz aıyndaǵy jaǵdaı boıynsha, SQO aýdandarynda 881 bos jumys orny bar, olarǵa 1305 adam qajet.
Eń suranysqa ıe mamandyqtar qatarynda elektr taratý jelilerin paıdalaný jónindegi elektromonter (114 oryn), aýyl sharýashylyǵy óndirisiniń traktorıst-mashınısi (45 oryn), matematıka pániniń muǵalimi (40 oryn), orys tili men ádebıeti pániniń muǵalimi (32 oryn), mal sharýashylyǵy keshenderi men mehanıkalandyrylǵan fermalardyń operatory (30 oryn) bar.
ıAǵnı aýyldyq jerlerde, ásirese energetıka, aýyl sharýashylyǵy jáne bilim berý salalarynda bilikti mamandarǵa degen suranystyń joǵary.
Esterińizge salaıyq, buǵan deıin Iran men Qytaıdan oralǵan qandastardyń teriskeıdegi tynys-tirshiligi týraly jazǵan edik.