SQO-daǵy Sergeev sý qoımasy tolyp, erneýinen asty
PETROPAVL. KAZINFORM – Soltústik Qazaqstan oblysynda boljam boıynsha sý tasqynynyń sharyqtaý shegi sáýir aıynyń ortasyna kelmek.
Óńirde kóktemgi sý tasqyny kezeńine daıyndyq jumystary kúsheıtilgen rejımde ótip jatyr. Oblys ákimi Ǵaýez Nurmuhambetov birqatar mańyzdy nysandardy aralap, jaǵdaıdy jeke baqylaýyna aldy. Tasqyn sýdyń jolynda turǵan Prıbrejnoe eldi mekeninde sý tasqynyna qarsy shtab qurý tapsyryldy.
- Qyzyljar aýdanyndaǵy qorǵanys qurylystarynyń daıyndyǵyn, Zarechnyı kentindegi aınalma kanaldyń jaǵdaıyn, sondaı-aq Petropavldaǵy gıdrotoraptaǵy ahýaldy kórdim. Barlyq negizgi ýchaskeler baqylaýǵa alynǵan, - dedi oblys ákimi.
Qazir Prıbrejnoe aýylyna aparatyn oblystyq mańyzy bar avtomobıl joly jańǵyrtýdan ótip jatyr. Onyń ishinde úsh aralyqty kópir ótkeliniń qurylysy da bar. Jumystar, mamandardyń aıtýynsha, belgilengen kestege sáıkes júrgizilip jatyr.
- 31 naýryz kúni Sergeev sý qoımasy tolyp, erneýinen asty. Qazirgi ýaqytta sý deńgeıi 8 santımetrdi quraıdy. «Qazgıdromet» kásiporny boljamyna sáıkes, sý tasqynynyń sharyqtaý shegi sáýir aıynyń ekinshi-úshinshi onkúndikterine kelmek, - deıdi Ǵaýez Nurmuhambetov.
Búginde ózenderdiń sý deńgeıine táýlik boıy monıtorıng júrgizilip otyr. Barlyq qajetti kúshter men quraldar tasqynnyń aldyn alýǵa jumyldyrylǵan.
Buǵan deıin QazAvtoJol ulttyq kompanııasynyń SQO fılıalynyń mamandary sý tasqynyna qarsy is-sharalardy qarqyndy túrde júrgizip jatqanyn jazǵan edik.