Túrkistan oblysynda nóser saldarynan kópirlerdi sý shaıyp, 81 adam evakýatsııalandy
TÚRKІSTAN. KAZINFORM – Tólebı aýdany Aqmeshit aýylynyń týrıstik aımaǵynda jaýyn-shashynnyń kóp túsýine baılanysty Aqmeshit ózenindegi sý deńgeıi kóterildi.
Saldarynan demalys aımaǵy men pıknık aýmaǵyn baılanystyratyn eki ýaqytsha qoldan jasalǵan kópirdi sý shaıyp ketken. Sondaı-aq Ekpindi aýmaǵyndaǵy ótkel zaqymdandy. Keı jerlerde sý deńgeıi 0,5 m-ge deıin jetken.
Oblystyq tótenshe jaǵdaılar departamentiniń málimetinshe, qutqarýshylar 81 adamdy evakýatsııalady.
– Oqıǵa ornyna TJM kúshteri jedel jetti. Ekpindi aýylynan 11 adam (7 bala) qaýipsiz jerge kóshirildi. Demalys aımaǵynan 70 adam evakýatsııalandy, onyń 20-sy bala, – delingen vedomstvo taratqan aqparatta.
Sonymen qatar ýaqytsha ótkel uıymdastyrý úshin arnaıy tehnıka jumyldyryldy. Zardap shekkender joq, medıtsınalyq kómekke júgingender tirkelmegen.
Oqıǵa ornynda TJM qyzmetkerleri, «Qazseldenqorǵaý», polıtsııa jáne jergilikti atqarýshy organdardyń ókilderi jumysyn jalǵastyryp jatyr.
Budan buryn Kentaýda nóser jaýynnan keıin kósheler men aýlalardy sý basyp qalǵanyn jazǵan edik.
