SQO-daǵy Sergeev sý qoımasy 98 paıyzǵa tolǵan

PETROPAVL. KAZINFORM – Soltústik Qazaqstan oblysynda kóktemgi sý tasqyny naýryzdyń úshinshi onkúndiginde jáne sáýirdiń basynda bastalady dep boljanǵan.

Bul týraly «Qazgıdromet» kásiporny oblystyq fılıalynyń dırektory Qymbat Merǵalımova málim etti.

Oblys aýmaǵynda qazir 27 gıdrologııalyq beket jumys isteıdi. Onyń 19-y turaqty, al segizi 1 aqpannan bastap iske qosylyp, aqpan-mamyr aılary aralyǵynda qoldanylady.

- Búginde ózenderdiń qysqy sý deńgeıi byltyrǵy kórsetkishterden 3-21 sm tómen. Al Sergeev sý qoımasy 98% tolǵan. Shaǵyn ózenderde muzdyń qalyńdyǵy 7-93 sm aralyǵynda bolsa, Esil ózeninde 49-74 sm. Al Sergeev sý qoımasynda 86 sm jetken. Bul ótken jylǵy mánderden tıisinshe 15 jáne 18 sm artyq. ıAǵnı muz keptelisi bolǵan jaǵdaıda sý jaıylý aýmaǵy kúrt ulǵaıýy múmkin, - deıdi Qymbat Merǵalımova.

Sý tasqynynyń bolýyna áser etetin meteorologııalyq kórsetkishterdiń biri – topyraqtaǵy kúzgi ylǵal qory, ol normadan bıyl 24-74% joǵary, al keı jerlerde eki eseden astam artyq jınalǵan. Sondaı-aq, topyraqtyń qatý tereńdigi 67–150 sm aralyǵynda, bul ótken jylmen salystyrǵanda joǵary.

- Bıyl qardaǵy sý qory kópjyldyq kórsetkishten 26-48% tómen, al byltyrǵy jylmen salystyrǵanda oblystyń kóp bóliginde 45% az. Qańtar aıynda jyralardy zertteý nátıjesi qar qory ótken jylmen salystyrǵanda 33-49% kem ekenin kórsetti. Erigen qar sýy mólsheri Ýálıhanov aýdanynda ótken jylmen salystyrǵanda 25% deıin artýy múmkin. Oblystyń ortalyq bóliginde kórsetkish byltyrǵy deńgeıge jýyq bolady. Al soltústik-batys aýdandarda 21% deıin tómen bolýy yqtımal, - deıdi fılıal dırektory.

Mamandardyń aldyn ala boljamy boıynsha, Sergeev sý qoımasyna keletin sý kólemi 2 mlrd tekshe metrge deıin jetýi múmkin. Bul qalypty deńgeıden 1,5 ese joǵary, biraq byltyrǵydan 2,5 ese az.

- Kópjyldyq gıdrologııalyq derekterdi, jaýyn-shashyn kólemin, topyraqtyń ylǵaldylyǵy men qatý tereńdigin eskere otyryp qaýipti aýmaqtardy úsh sanatqa bóldik. Joǵary táýekel ýchaskelerine Ǵ. Músirepov atyndaǵy aýdan, Shal aqyn, Esil, Qyzyljar aýdandary men Petropavl endi. Ortasha táýekel aımaǵynda – Taıynsha, Aqjar, Ýálıhanov, Tımırıazev jáne Aıyrtaý aýdandary. Tómen táýekel sanatyna Mamlıýt, Jambyl, Maǵjan Jumabaev jáne Aqqaıyń aýdandary engizildi, - deıdi Qymbat Merǵalımova.

Buǵan deıin Pavlodar oblysynda 45 aýyl oıpań jerde ornalasyp, kóktemde sý basý qaýpi bar ekenin jazǵan edik.