SQO-da jylytý maýsymy bastalǵaly 6 adam ıis tıip ýlandy
SQO tótenshe jaǵdaılar departamenti bastyǵynyń orynbasary Dmıtrıı Rastıhınniń aıtýynsha, jyl basynan oblysta 563 órt tirkelgen.
Saldarynan 33 adam qaza taýyp, 16 adam jaraqattandy. 21 adam, sonyń ishinde 7 bala ıis tıip, ýlandy. Kelgen materıaldyq shyǵyn 420 mln teńgeden asady.
«Órttiń 74 % jeke turǵyn úı sektoryna tıesili. Órttiń shyǵýyna peshti paıdalaný erejelerin buzý, ýaqytynda tazartpaý, sondaı-aq otpen abaısyz jumys isteý sebep. Jylytý maýsymy bastalǵaly oblys aýmaǵyndaǵy turǵyn úı sektorynda 30 órt tirkeldi, qaza tapqan jáne jaraqat alǵan adamdar tirkelmedi. Alaıda, 6 adam ıis tıip ýlandy, onyń ishinde 3 bala bar», - deıdi Dmıtrıı Rastıhın.
Osyndaı oqıǵalardyń biri Qyzyljar aýdany ıAkor eldi mekeninde boldy.
Peshtegi aqaýdan úı ıesi 1994 jyly týǵan kelinshek pen onyń 8, 7 jáne 4 jastaǵy úsh balasy kómirqyshqyl gazyna ýlanyp qaldy. Olar aýrýhanaǵa jatqyzyldy.
«Jeke turǵyn úı sektorynda órttiń aldyn alý úshin departament jergilikti atqarýshy organdarmen, eriktilermen, jergilikti polıtsııa qyzmetimen birge órttiń aldyn alý boıynsha jumys júrgizip jatyr. 58 myńǵa jýyq adamdy qamtı otyryp, 28 myńnan astam úıdi aralap óttik, órt qaýipsizdigi erejelerin túsindiretin 52 myńnan astam jadynama taratyldy. Halyqtyń áleýmettik osal toby retinde 12 560 adam turatyn 4,5 myń baspana esepke alynǵan. Jylytý maýsymy bastalmaı turyp órttiń aldyn alý jumystary júrgizildi. Nátıjesinde 1040 úıden 2 myńǵa jýyq olqylyq anyqtaldy. Qazirgi ýaqytta 373 turǵyn úı kemshilikterdi joıǵan joq», - deıdi Dmıtrıı Rastıhın.
SQO-da maýsym aıynan bastap halyqtyń áleýmettik osal tobyna jatatyn turǵyndardyń úılerine 1131 órtke qarsy datchık ornatyldy.
Jyl sońyna deıin taǵy 372 qurylǵyny ornatý josparlanǵan.