SQO-da jyl basynan beri jeti er adam áıeliniń tegin alǵan

PETROPAVL. KAZINFORM – Soltústik Qazaqstan oblysynda  bıyl jeti adam áıeliniń tegine ótken, sonyń úsheýi – aýyl turǵyny. Aıyrtaý aýdanynda eki er adam jáne Qyzyljar aýdanynyń turǵyny zaıybynyń tegine tańdaý jasaǵan.

Elimizde 16 jasqa tolǵan ár adam atyn, ákesiniń atyn jáne tegin ózgertýge quqyly. Zańnamada qaı kezde ózgertýge bolatyndyǵy da kórsetilgen. Máselen: óz aty, ákesiniń aty nemese tegi yńǵaısyzdyq týdyrsa, aıtylýy qıyn bolsa, sondaı-aq memlekettik tirkeý kezinde erli-zaıypty ortaq tegi bolýdy qalasa – ózgerte alady. Áıeliniń úıinde turýdy oǵashsynyp, «kúshik kúıeý» atanýdan qashatyn qazaq qoǵamy úshin bul jat bolǵanymen, byltyr elimizde 200-ge jýyq er adam zaıybynyń tegin alǵan.

Azamattyq hal aktilerin tirkeý organy byltyrǵy 1 shildeden bastap «Azamattarǵa arnalǵan úkimet» memlekettik korporatsııasy» KE AQ qaraıdy. Mamandandyrylǵan halyqqa qyzmet kórsetý ortalyǵy qyzmetkerleriniń málimetinshe, osy aralyqta SQO-da 3400-ge jýyq neke tirkelgen, al jyl basynan 1775 jup shańyraq qurdy. Nekege otyrǵandardyń 354-i – jasy qyryqtan asqandar, 127-si – 50-den assa, 60-tan asqan 71 jup nekelerin zańdastyrǵan.

Azamattyq hal aktilerin tirkeý organdarynyń málimetinshe, bıyl shańyraq kótergen eń eresek kúıeý jigittiń jasy 63-te bolsa, onyń qalyńdyǵy 60-qa tolǵan. Neke Aqjar aýdanynda tirkeldi.

Ulttyq statıstıka bıýrosynyń málimetinshe, jalpy elimizde byltyr 121 myńǵa jýyq neke tirkelgen. Bul 2022 jyldan shamamen 8 myńǵa kem. Úılený kórsetkishinen 13 074 sanymen Almaty qalasy birinshi orynda tur. Odan keıin 10 392 sanymen Astana qalasy jáne 10 087 kórsetkishimen Almaty oblysy keledi.

Ajyrasýlar boıynsha, Almaty qalasy kósh bastap tur. Byltyr munda 4761 juptyń shańyraǵy shaıqalǵan, Qaraǵandy oblysynda – 3475, Astana qalasynda 3389 jup ajyrasyp ketken. SQO-da byltyr 1472 erli-zaıypty ajyrasýǵa ótinish berdi.

Buǵan deıin SQO-da bıyl jylytý maýsymyna daıyndyqqa 31 mlrd teńge bólingenin jazǵan edik.