SQO-da jyl basynan beri ınternet alaıaqtyqtyń 110 deregi tirkeldi

PETROPAVL. KAZINFORM — Soltústik Qazaqstan oblysynda polıtseıler Memlekettik kirister departamentiniń qyzmetkerlerimen kezdesip, ınternet alaıaqtyqqa qatysty jańa qaýip týraly eskertti. 

Ótken jyldyń qyrkúıeginen bastap dropperlik úshin, ıaǵnı ınternet alaıaqtarǵa jábirlenýshilerden alynǵan aqshany aýdarýǵa kómekteskenderge qylmystyq jaýapkershilik bar.

SQO Polıtsııa departamentiniń málimetinshe, adam eriksiz dropperge aınalýy múmkin.

Qylmyskerler kez kelgen adamnyń shotyna iri somada aqsha aýdaryp, keıin ony qatelesip jibergenin aıtyp, qarajatty basqa bank kartasyna qaıta aýdarýdy suraıdy. Mundaı talapty oryndaýǵa bolmaıdy. Beıtanys adamnyń ótinishin oryndaý arqyly siz qylmysqa qatysýshy bolyp shyǵa kelesiz.

Mundaı jaǵdaıda bankke ótinish berip, qarajattyń belgisiz nómirden jáne belgisiz maqsatpen túskenin, ony paıdalanbaıtynyńyzdy aıtyp, aqshany jiberýshige qaıtarýdy suraýyńyz qajet.

Aqshany jibergen adam, bálkim, kıberalaıaqtardyń qurbany bolǵan azamat bolýy múmkin. Sondaı-aq mundaı kútpegen aqsha aýdarymdary týraly polıtsııaǵa da habarlaý kerek.

Osy taqyrypta Memlekettik kirister departamentinde ótken kezdesýge beınekonferentsııa arqyly vedomstvonyń barlyq qyzmetkerleri tyńdady, jedel ýákilder kıberqylmystyń ózge túrleri týraly da aıtyp berdi.

Jyl basynan beri SQO-da ınternet-alaıaqtyqtyń 110 faktisi tirkeldi. Onyń 31-inde jeke kásiporyndardyń qyzmetkerleri jábirlenýshi bolǵan. Sondaı-aq zardap shekkenderdiń qatarynda 21 zeınetker, bilim salasynyń 13 qyzmetkeri men stýdentter bar.

Buǵan deıin 2025 jyly alaıaqtar qazaqstandyqtarǵa 84,5 mln ret qońyraý shalǵanyn jazǵan edik.