SQO-da janýarlardan zardap shekkender sany 33%-ǵa artty
PETROPAVL. KAZINFORM – Soltústik Qazaqstan oblysynda bıyl eki aıda 239 adam antırabııalyq kómekke júgindi.
SQO sanıtarııalyq-epıdemıologııalyq baqylaý departamenti basshysy Áset Jumataevtyń aıtýynsha, 2025 jyldyń uqsas kezeńinde 164 adam medıtsınalyq kómek suraǵan, ıaǵnı bıyl zardap shekkender sany 33% artyq.
– Eldi mekenderde qańǵyrǵan ıt-mysyq sany azaımaı, kerisinshe kóbeıgen. Saldarynan olardan zardap shekkender sany da artqan. Petropavlda 123 adamdy janýarlar tistegen, tyrnaǵan, bul 2025 jylmen salystyrǵanda 39%-ǵa kóp. Jaraqat alǵandardyń 56%-yn nemese 133 adamdy ıt qapqan. Onyń ishinde 69 adamdy kóshede ıesiz júrgen ıtter qapqan. 91 adam nemese 38%-y mysyqtardan zardap shekken. Sondaı-aq 15 adam túlki, iri qara mal, tyshqan, egeýquıryq jáne basqa janýarlardan jaraqat alǵan, - deıdi Áset Jumataev.
Mamannyń aıtýynsha, barlyq jaǵdaı boıynsha epızootologııalyq jáne epıdemıologııalyq tekserý júrgizildi. 239 adamǵa antırabııalyq vaktsına salyndy, sonyń ishinde 128 adamǵa tek vaktsına, 111 adamǵa ımmýnoglobýlın jáne vaktsına qoldanyldy.
– SQO qutyrmanyń tabıǵı oshaǵy aımaǵynda ornalasqan. Ásirese qys-kóktem ýaqytynda qaýipti, óıtkeni vırýs jabaıy janýarlar arqyly eldi mekenderge jetip, úı janýarlaryna juǵýy múmkin. Bul – óte qaýipti ınfektsııalyq aýrý, sebebi eger alǵashqy saǵattarda medıtsınalyq kómek kórsetilmese, adam ólimge ákeletin dertke shaldyǵady. Óńirde belsendi aldyn alý jumystary júrgizilýiniń arqasynda 1998 jyldan beri qutyrma juqtyrý tirkelgen joq, - deıdi departament basshysy.
Mamannyń aıtýynsha, qaýipti dertten saqtaný úshin ıtterdi mindetti túrde baılap nemese qorada ustaǵan jón. Úı janýarlary vırýsty juqtyrmaýy úshin jabaıy janýarlarǵa jaqyndatpaý kerek. Sonymen qatar barlyq ıtke qutyrmaǵa qarsy vaktsına salynyp otyrýy qajet.
– Eger de abaısyzda janýarlar tyrnap nemese qaýyp alsa, jarany keminde 15-20 mınýt boıy sabynmen jýý kerek. Keıin 70% spırt nemese ıodpen óńdeý qajet. Sondaı-aq dereý medıtsınalyq mekemege baryp, antırabııalyq vaktsına alyńyz. Qutyrma – emi joq aýrý. Dertten qorǵanýdyń birden-bir joly – vaktsınatsııa. Ekpe ýaqtyly jasalsa, adam ómirine keler qaýip joq, - deıdi Áset Jumataev.
Buǵan deıin Qostanaı oblysynda qutyrmaǵa shaldyqqan sileýsin aýylǵa kirip ketkenin jazǵan edik.