SQO-da zeınetker eki páterinen aıyrylyp, dalada qala jazdady
PETROPAVL. KAZINFORM - Petropavlda 66 jastaǵy zeınetker onlaın alaıaqtardyń qurbany boldy.
Soltústik Qazaqstan oblysy Polıtsııa departamenti baspasóz qyzmetiniń málimetinshe, áıelge qylmysker qońyraý shalyp, ózin quqyq qorǵaý organynyń qyzmetkerimin dep tanystyrǵan. Ol zeınetkerdi alaıaqtar páterińdi tartyp almaqshy jáne olardy áshkereleý úshin baspanany satý boıynsha tezirek «jalǵan mámile» rásimdeý qajet dep, aıtqanyna kóndiredi. Sondaı-aq qylmyskerlerdi ustaý boıynsha qupııa operatsııa bolǵandyqtan, eshkimge aıtpaýdy tapsyrady.
Qala turǵyny múlkin saqtap qalmaq bolyp ózine tıesili eki páterin satyp jiberedi. Týystary munda bir shıkiliktiń baryn sezip, jábirlenýshini polıtsııaǵa júginýge kóndiredi. Alaıda ol aqshanyń bir bóligin qylmysker kórsetken shotqa aýdaryp, al qalǵanyn kýrerge tapsyryp úlgergen eken.
Kýrer 27 mln teńgeni Astana qalasyna jetkizedi. Aqsha eki dropper arqyly ótken, jedel ýákilderdiń úılesimdi jumysynyń nátıjesinde qarjy shetelge jóneltilgenshe tárkilenip, zańdy ıesine qaıtaryldy.
Budan bólek, polıtseıler jábirlenýshiniń azamattyq sot isin júrgizý tártibinde qylmyskerdiń nusqaýy boıynsha aýdarǵan aqshasyn, bank chekteriniń saqtalýyna baılanysty qaıtaryp alýǵa múmkindigi baryna toqtala ketti.
Qazir asa iri kólemdegi alaıaqtyq faktisi boıynsha jedel-izdestirý is-sharalary jalǵasqan.
Tártip saqshylary: «UQK-dan», «polıtsııadan», «prokýratýradan» degen qońyraýlarǵa, eger olar WhatsApp arqyly shalynsa jáne sóılesýshiler qandaı da bir qarjylyq operatsııa jasaýǵa azǵyrsa senbeý qajettigin eskertedi. Osyndaı qońyraý shalynǵan jaǵdaıda, sóılesýdi toqtatyp, aqparatty tekserý úshin sizge qońyraý shalǵan organǵa habarlasqan jón.
Buǵan deıin Soltústik Qazaqstan oblystyq advokattar alqasynyń múshesi, tájirıbeli advokat Elena Ignatenko alaıaqtarǵa aldanǵan jaǵdaıda ne isteý qajettigin aıtqan edi.