Astanada «Islam tarıhy» murajaıy ashyldy
ASTANA. KAZINFORM — Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanulynyń tapsyrmasymen QMDB dinı basqarmasy ǵımaratynan «Qazaq dalasyndaǵy ıslam tarıhy» murajaıy ashyldy.
Murajaıdyń ashylý rásimine QMDB Tóraǵasy, Bas múftı Naýryzbaı qajy Taǵanuly, Qazaqstan Respýblıkasy Parlamenti Senaty men Májilisiniń depýtattary, zııaly qaýym ókilderi, QMDB Ǵulamalar, Sarapshylar keńesiniń músheleri qatysty.
— Búgin biz halqymyzdyń san ǵasyrlyq rýhanı murasyn, ımanı qundylyqtaryn, tarıhı jadymyzdy jańǵyrtatyn erekshe bir ıgi istiń kýási bolyp otyrmyz. Qazaqstan musylmandary dinı basqarmasynda Islam órkenıetiniń ár dáýirinen syr shertetin, qasıetti jádigerler men sırek qoljazbalardy bir arnaǵa toǵystyrǵan tarıhı murajaıdyń ashylýy el rýhanııaty úshin asa mańyzdy oqıǵa dep sanaımyn. Bul murajaı tek ótkenniń kýási ǵana emes, bolashaq urpaqqa baǵyt-baǵdar beretin tarıhı taǵylym ortalyǵy bolmaq. Munda qoıylǵan árbir jádiger halqymyzdyń júrip ótken jolynyń aıǵaǵy, árbir qoljazba babalarymyzdyń danalyǵy men iliminiń kórinisi. Shyn máninde, bizdiń tarıhymyz Islam dinimen bite qaınasqan. Sonyń aıqyn dáleli — Qarahanıtter memleketi dáýirinen bastaý alatyn rýhanı órleý kezeńi. Bul kezeńde Islam dini memlekettik deńgeıde qabyldanyp, meshitter men medreseler salynyp, ǵylym men bilim damydy. Osy dáýirden jetken Quran qoljazbalary men dinı eńbekter — búgingi urpaq úshin baǵa jetpes qazyna, — dedi Bas múftı.
Sondaı-aq, shara aıasynda Islam ǵylymı-zertteý ınstıtýtynyń dırektory Tóreáli Qydyr arnaıy sóz sóılep jańadan ashylǵan murajaıǵa qundy tarıhı jádigerlerdi syıǵa tartty.
Rýhanı-mádenı mańyzdy murajaıda qazaq jerine ıslam dininiń kelýi, onyń tarıhı damýy, ult rýhanııatymen sabaqtastyǵy, qazaq dalasynan shyqqan ǵulamalardyń murasy, dinı-aǵartýshylyq baǵyttaǵy qundy jádigerler men tarıhı derekter kópshilik nazaryna usynyldy.
Buǵan deıin bıyl qazaqstandyq qajylarǵa qandaı talaptar qoıylatynyn jazdyq.
