SQO-da zańsyz alkogol óndirgen «tseh» joıyldy
PETROPAVL. KAZINFORM – Petropavldyń 34 jastaǵy turǵyny ózine tıesili qoımany araq-sharap quıatyn tsehqa aınaldyrǵan. Zańsyz ári qaýipti ónim tárkilendi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, uıymdasqan qylmysqa qarsy kúres basqarmasynyń qyzmetkerlerine aktsızsiz alkogoldi zańsyz saqtaý faktisi týraly aqparat kelip túsken. Tártip saqshylary SQO boıynsha Ekonomıkalyq tergeý departamentiniń qyzmetkerlerimen birge Petropavl turǵynynyń úıin tekserdi. Nátıjesinde oǵan tıesili qoımadan quramynda spırti bar kontrafaktili ónim shyǵaratyn «tseh» anyqtaldy.
Úı-jaıdan jalǵan aktsızdik markalary bar quıýǵa daıyndalǵan 660 bótelke, qoldan jasalǵan, quramynda spırti bar ónimmen 44 bes lıtrlik plastıkalyq bótelke, taza spırt quıylǵan 11 bes lıtrlik bótelke, aktsızdik markalar, shyny ydystar, 200 lıtrlik bóshke, spırtometr jáne basqa da jabdyqtar tárkilendi.
Bul fakti boıynsha jınalǵan materıaldy SQO boıynsha ekonomıkalyq tergeý departamentiniń qyzmetkerleri sotqa deıingi tergep-tekserýlerdiń biryńǵaı tizilimine engizdi.
Buǵan deıin Sý resýrstary jáne ırrıgatsııa mınıstrligi SQO-da 910 shaqyrym sý qubyryn salý jáne rekonstrýktsııalaý jumysyn bastaǵanyn jazǵan edik.
