Qytaıǵa un jetkizý kólemi 2 esege artty - Kólik mınıstrligi
ASTANA. KAZINFORM - Qazaqstan Respýblıkasy Kólik mınıstrligi múddeli memlekettik organdarmen, tasymaldaýshylarmen jáne bıznes-qoǵamdastyq ókilderimen birlesip, astyq tasymaly máseleleri boıynsha Jedel shtab otyrysyn ótkizdi, dep habarlaıdy mınıstrliktiń baspasóz qyzmeti.
Otyrys barysynda astyq tasymaly salasyndaǵy jaǵdaı qaralyp, tasymaldaýdy turaqty ári úzdiksiz uıymdastyrýdy qamtamasyz etýge baǵyttalǵan kelisilgen jedel sharalar qabyldandy.
2026 jyldyń I toqsanynyń qorytyndysy boıynsha astyq tasymaly kólemi 4,1 mln tonnany qurap, ótken jyldyń sáıkes kezeńimen salystyrǵanda 15%-ǵa artqany baıqalyp otyr.
Eksporttyq tasymaldar 3,2 mln tonnaǵa (+18%), al ishki tasymaldar 0,9 mln tonnaǵa (+8%) jetti. Ortalyq Azııa elderi baǵyty boıynsha aıtarlyqtaı ósim tirkeldi — 48%-ǵa artyp, 2,1 mln tonnany qurady, onyń ishinde Ózbekstan baǵytyna 1,5 mln tonna jóneltildi.
Reseı Federatsııasy baǵytyna jáne onyń aýmaǵy arqyly tasymal kólemi 512 myń tonnany qurady.
Aýǵanstan baǵyty boıynsha tasymal 4,2 esege ósip, 302 myń tonnaǵa jetti.
Qytaı baǵytyna jemdik un jetkizý kólemi 2 esege artyp, 1 mln tonnaǵa jetti.
- Jedel shtabtyń jumysy tasymaldaý úderisiniń turaqtylyǵyn qamtamasyz etý jáne naryq qatysýshylarynyń is-qımylyn úılestirý maqsatynda turaqty negizde jalǵasatyn bolady,-delingen habarlamada.
Osyǵan deıin Qazaqstannyń Grýzııaǵa eksport kólemin arttyrǵany týraly jazdyq.
