SQO-da úı qustary belgisiz aýrýdan qyrylyp jatyr
PETROPAVL. KAZINFORM — Soltústik Qazaqstan oblysy Qyzyljar aýdany Býgrovoe eldi mekeninde turǵyndardyń qoradaǵy taýyq-qazy belgisiz aýrýdan qyryla bastady.
Osy aýyldyń turǵyny Svetlana Tkachenkonyń aıtýynsha, kúnde qoradan 15-20 qustyń óligin tabady. Al aldyńǵy kúni otbasyǵa qyrylǵan 56 qusty laqtyrýǵa týra kelgen.
— Qoraǵa kirýge júreksinetin boldym, taǵy qanshasy óli tabylady dep. Iıa, mine, aıtqandaı-aq, birnesheýi ólip, shashylyp jatyr. Mynalar da aýyryp tur, bular da uzaqqa barmaıdy. Ótken aptanyń jeksenbisinde óle bastaǵan. Dúısenbi veterınarlardy shaqyrdyq. Olar tekseriske aldy, biraq nátıjesi tek bir aptadan keıin ǵana belgili bolady dedi. Qustardyń neden qyrylyp jatqanyn bilmeımiz, — deıdi aýyl turǵyny.
SQO veterınarııa basqarmasy osy oqıǵaǵa qatysty túsinik berdi. Mamandardyń aıtýynsha, búginde Býgrovoe aýylyndaǵy jaǵdaı turaqtandy, qustardyń jappaı qyrylýy toqtady.
— Veterınarııa basqarmasy qustar ólgen aýlalardy tekserdi. Patologııalyq materıaldardan synamalar alynyp, oblystyq veterınarııalyq zerthanaǵa jiberildi. Zertteý nátıjesi boıynsha qus tumaýy anyqtalǵan joq. Pasterellezge qatysty taldaýlar áli júrgizilip jatyr. Halyqqa veterınarııalyq erejelerdi saqtaý qajettigi boıynsha túsindirý jumystary júrgizildi. Qoralar tazalanǵannan keıin dezınfektsııa júrgiziledi, — dedi SQO veterınarııa basqarmasynyń basshysy Janat Ámirjanov.
Mamannyń aıtýynsha, qus ıelerine qusty aýladan shyǵarmaý, antıbıotıktermen em júrgizý jáne veterınarııalyq talaptardy saqtaý usynyldy. Al qyrylǵan qus mal qorymynda joıyldy.
— Veterınarııalyq qyzmet mamandary epızootııalyq jaǵdaıdy kúndelikti baqylaýda ustap, qajetti profılaktıkalyq jáne indetke qarsy sharalardy júrgizip jatyr. Jaǵdaı tolyq baqylaýda. Jalpy bıyl sáýir aıynda Býgrovoe aýylynda qus tumaýyna qarsy 3051 qusqa vaktsına egildi, onyń ishinde taýyqtar da, qaz-úırek, kúrketaýyq ta bar, — dedi basqarma basshysy.
Buǵan deıin SQO-da buralqy ıtter turǵyndardyń qus-malyna aýyz salyp, maza bermeı jatqandyǵyn jazǵan edik.