Úkimet Rıdder qalasynyń jylýmen qamtý senimdiligin arttyrýǵa 1,8 mlrd teńge bóledi
ASTANA. KAZINFORM - Úkimet Memleket basshysy Qasym-Jomart Toqaevtyń tapsyrmasyn júzege asyrý aıasynda Shyǵys Qazaqstan oblysy Rıdder qalasyndaǵy jylý jelileri men JEO jabdyqtaryn jóndeýge rezervten shamamen 1,8 mlrd teńge bóldi. Tıisti qaýlyǵa Premer-mınıstr Oljas Bektenov qol qoıdy.
QR Úkimeti bapasóz qyzmetiniń habarlaýynsha, qarajat qalany jylýmen qamtý senimdiligin arttyrýǵa jáne ınfraqurylymdy 2026-2027 jyldardaǵy jylytý maýsymyna daıyndaýǵa jumsalady. Bólingen qarjy jylý jelisiniń tozyǵy jetken 12 ýchaskesine, sondaı-aq Rıdder JEO-daǵy №5 jáne №6 qazandyq agregattarynda kúrdeli jóndeý jobalaryn aıaqtaýǵa baǵyttalady.
Jumystardy júrgizý qajettiligin tehnıkalyq tekserý nátıjeleri rastady. Mamandar jylý júıesiniń turaqty jumysyn qamtamasyz etý úshin birinshi kezekte jóndeýdi qajet etetin ýchaskeler men jabdyqtardy anyqtady. Ótken jylytý maýsymy barysynda jekelegen ýchaskelerde zaqymdanýlar men tozý belgileri anyqtalyp, olardy josparly túrde jańartý qajettiligi dáleldendi.
Qazandyq agregattary men jylý jelilerin jóndeý jylý júıesiniń turaqty jumysyn arttyryp, qala turǵyndaryn jylýmen qamtýdyń senimdiligin jaqsartýǵa múmkindik beredi.
Osyǵan deıin Energetıka mınıstrliginiń Memlekettik energetıkalyq qadaǵalaý jáne baqylaý komıtetinde 2025–2026 jyldardaǵy jylytý maýsymynyń qorytyndysy boıynsha respýblıkalyq selektorlyq keńes ótkizgen bolatyn.
