SQO-da úsh sý aıdynynda balyq qyryldy
PETROPAVL. KAZINFORM – Soltústik Qazaqstan oblysyndaǵy úsh sý aıdynynda jalpy salmaǵy 4 tonnaǵa jýyq balyq qyryldy.
Esil oblysaralyq basseındik balyq sharýashylyǵy ınspektsııasynyń málimetinshe, ólgen balyq Petropavldaǵy Hromzaýyt aýdany mańynda, Esil ózeniniń eski arnasynan tabylǵan. Sý betine qalqyp shyqqan 25 kg torta balyq pen shortan joıyldy. Aldyn ala boljam boıynsha, balyq sý aıdynynyń keı ýchaskeleriniń túbine deıin qatýynan ólýi múmkin.
Petropavldaǵy Pestroe kólinen de shortan men torta balyqtyń ólekseleri tabyldy. Jalpy salmaǵy – 12 kg.
Al Taıynsha aýdany Kantemırovka eldi mekeni mańyndaǵy kólde móńke balyǵy qyrylyp qaldy. Mamandardyń aıtýynsha, bul sý aıdyny eshkimge paıdalanýǵa berilmegen jáne jergilikti mańyzy bar balyq sharýashylyǵy kólderiniń tizimine engizilmegen. Ólgen 350 kg balyq tolyq jınalyp, joıyldy. Sý jándikteriniń qyrylýyna kóldiń taıazdyǵy jáne qysta túbine deıin qatýy sebep bolýy múmkin.
- Jumys toby qurylyp, oqıǵa ornyna bardy. Sýdyń jáne ólgen balyqtyń synamasy alyndy. Olar zertteýge jiberilip, saraptama qorytyndysy balyqtyń neden qyrylǵanyn kórsetedi, - deıdi bólim basshysy Ildar Kakımov.
Buǵan deıin SQO men Aqmola oblysynda 15 sáýirden bastap balyqtyń keı túrlerin aýlaýǵa tyıym salynatyndyǵyn jazǵan edik.