Qazaqstan halqynyń sany jóninde jańa derekter jarııalandy
ASTANA. KAZINFORM — 2026 jyldyń 1 sáýirindegi jaǵdaı boıynsha, Qazaqstan halqynyń sany 20 547 909 adamǵa jetti. Jyl basynan beri bul kórsetkish 48 087 kisige artqan, ıaǵnı ósim qarqyny 0,23% deńgeıinde qalyp otyr.
Ulttyq statıstıka bıýrosynyń málimetinshe, 1 qańtar men 1 sáýir aralyǵynda 42 879 bala ómirge kelgen, sondaı-aq 5 208 azamat elimizge qonys aýdarǵan.
Oń dınamıka, ásirese, shaharlarda baıqalady. Qazir qalalarda 13 137 950 jan turady, ıaǵnı bul kórsetkish 52 840 adamǵa kóbeıgen. Al ósim qarqyny — 0,4%, demek respýblıkadaǵy ortasha deńgeıden joǵary. Qalalyqtardyń sany artýyna sábılerdiń dúnıege kelýi men eldi mekenderden jurttyń kóshýi qatar áser etken.
Aýyl buqarasynyń sany, kerisinshe, azaıyp barady. Búginde aýyldyq jerlerde 7 409 959 kisi turady, ıaǵnı jyl basyndaǵy jaǵdaımen salystyrǵanda, 4 753 adamǵa az. Eldi mekenderde 16 816 sábı týǵanmen, kórsetkish jaqsarmaı otyr. Óıtkeni, 21 569 azamat aýyldardan kóship ketken.
Óńirler arasynda buqaranyń kóbeıýi jaǵynan Astana (1,44%), Shymkent (0,68%) jáne Almaty oblysy (0,62%) kósh bastap tur. Al bala týý kórsetkishi turǵysynan Túrkistan oblysy men Shymkent qalasy tizimniń eń basynda.
Mıgratsııalyq úderister de ár aımaqta ártúrli deńgeıde. Halqy eń kóp kóship ketken óńirler retinde Túrkistan jáne Jambyl oblystaryn ataýǵa bolady. Al jurt eń kóp kóship kelgen shahar — Astana. Elordaǵa 18 myńnan astam azamat qonys aýdarǵan.
Aıta keteıik, buǵan deıin qazaqtar halyq sanyn qalaı eseptegenin jazǵanbyz.
Sondaı-aq, Qytaıdan Qazaqstanǵa kelýshi qandastar sany rekordtyq deńgeıge jetkeni belgili boldy.
