SQO-da ýaqytsha 50-ge jýyq orman tálimbaǵy ashyldy

PETROPAVL. KAZINFORM – Soltústik Qazaqstan oblysynda aldaǵy eki jylda 48 mln astam aǵash kóshetin otyrǵyzý mindeti tur. 

SQO Tabıǵı resýrstar jáne tabıǵat paıdalanýdy retteý basqarmasynyń málimetinshe, Prezıdent tapsyrmasyna saı sońǵy bes jylda 74 mln teńge tal egildi. Josparǵa sáıkes, oblysta jalpy 122 mln kóshet otyrǵyzylýy tıis.

Aýqymdy jospardy júzege asyrý úshin aldymen sapaly tuqym qory qajet. Ormanshylar tuqym jınaýdan bastap, kóshet ósirýge deıingi ár kezeńge erekshe jaýapkershilikpen qaraıdy. Bir kóshetti standartty deńgeıge jetkizý úshin keminde eki jyl ýaqyt qajet. Qazirgi tańda oblys aýmaǵynda ýaqytsha 43 orman pıtomnıgi jumys isteıdi. 2025 jyldyń kúzinde 15 gektar aýmaqqa tuqym sebildi, odan 15 mln kóshet alý josparlanǵan.

– Tálimbaqtardyń basym bóliginde óńirdiń baılyǵy – qaıyń ósirilip jatyr. Qys boıy qar astynda jatqan kóshetterge ásirese jazda turaqty kútimdi talap etedi: kúndelikti sýaryp, aramshópterdi julyp, topyraqty baqylaýda ustaý qajet.

Tuqym jınaý – orman sharýashylyǵyndaǵy eń jaýapty kezeńderdiń biri. Mysaly, qaraǵaı búrlerin qazan aıynyń sońynan naýryzǵa deıin ǵana jınaýǵa bolady. Ýaqytynan kesh qalsa, tuqym jaramsyz bolyp qalady. Sondaı-aq jerge túskenin emes, aǵashta turǵanyn ǵana alý kerek. Keıde jeldiń ótinde, sýyqta jınalady. Keıin ony arnaıy peshterde belgili bir temperatýrada keptirip, tuqymdary alynady, - deıdi basqarma mamany Sáýle Súleımenova.

Al qaıyńnyń tuqymyn ormanshylar shilde-tamyzda jınaıdy. Aǵashtyń «syrǵalaryn» keptirip, egýge daıyndaıdy.

– Óńirde negizinen qaıyń men qylqan japyraqty aǵashtar ósiriledi. Byltyr 7,8 tonna aǵash-buta tuqymy jınalyp, olardyń sapasy Şýchınsk qalasyndaǵy respýblıkalyq orman selektsııalyq-tuqym sharýashylyǵy ortalyǵynda tekserildi. Sonymen qatar, kóshet otyrǵyzýǵa arnalǵan jerlerdi anyqtaý úshin 728 gektar alqapqa geobotanıkalyq zertteý júrgizildi. Keshendi jospardy júzege asyrýǵa 2025 jyly jergilikti bıýdjetten 410 mln teńge bólindi, - deıdi Sáýle Súleımenova.

Ormanshylardyń jumysy tuqym ázirlep, kóshet otyrǵyzýmen shektelmeıdi. Ár mamanǵa myńdaǵan gektar aýmaq bekitilgen. Olar jyl boıy ormandy aralap, órt qaýipsizdigin qadaǵalaıdy, zańsyz aǵash kesý men brakonerlikke qarsy kúresedi.

Buǵan deıin Almatyda magnolııa aǵashtarynyń gúldeý maýsymy bastalǵanyn jazǵan edik.