SQO-da týberkýlez juqtyrǵandar sany artqan

PETROPAVL. QazAqparat – Soltústik Qazaqstan oblysynda byltyr jańadan 210 adamnan týberkýlez anyqtaldy. Bul aldyńǵy jylmen salystyrǵanda 15,7 % kóp, dep habarlaıdy QazAqparat tilshisi.

Búgin Petropavldaǵy saýda ortalyqtarynyń birinde SQO ftızıopýlmonologııa ortalyǵynyń uıymdastyrýymen fleshmob ótti.

Іs-shara 24 aqpanda bastalǵan týberkýlezge qarsy kúres aılyǵy aıasynda uıymdastyryldy.

Ortalyq mamandary turǵyndarǵa qaýipti dert jáne onyń belgileri jaıynda habardar etetin broshıýralar taratyp, jyljymaly flıýrografııa apparatynan ótýge shaqyrdy.

Fleshmob barysynda ftızıopýlmonologııa ortalyǵy mamandary arnaıy ázirlegen bılerin kórermen nazaryna usyndy.

Oblystyq densaýlyq saqtaý basqarmasynyń málimetinshe, týberkýlezdi anyqtaý jumystarynyń oń nátıjesinde byltyr jańadan 210 adamda dert tabyldy.

Bul 2021 jylmen salystyrǵanda 15,7 % kóp.

Sonyń ishinde 18 jasqa deıingi 10 bala týberkýlez juqtyrǵan. 2021 jyly 8 balada anyqtalǵan.

Óńirde týberkýlezdi der kezinde anyqtaýǵa tehnıkalyq múmkindik jetkilikti. 42 rentgen-flıýrografııa tehnıkasy bolsa, sonyń 14-i – jyljymaly apparat.

Byltyr 330 myńǵa jýyq adam tekserilip, nátıjesinde flıýrografııa 181 syrqat adamdy anyqtady.

Jyljymaly flıýrografııa arqyly 63 myńǵa jýyq adam tekserilip, 452 adamnyń nátıjesi oń boldy. 32 adamda belsendi týberkýlez, ıaǵnı derttiń taralatyn túri anyqtaldy.