SQO-da taǵy bir aýyl ishimdikten bas tartty
PETROPAVL. KAZINFORM - Soltústik Qazaqstan oblysynda spırttik ishimdikten tolyq bas tartqan aýyldardyń sany 13-ke jetti.
Bul tizimde endi M.Jumabaev aýdanyndaǵy Sýlyshoq eldi mekeni de bar. Petropavldan 115 km qashyq jatqan aýylda, polıtsııanyń málimetinshe, sońǵy jyldary mas kúıinde jasalǵan birde-bir quqyqbuzýshylyq tirkelmegen.
Sýlyshoq aýylynda 217 adam turady, 45 úı bar. Eldi mekende balabaqsha men negizgi orta mektep jumys isteıdi.
Aýyl turǵyndarynyń negizgi bóligi osyndaǵy «Agro-Kompleks-Sýlyshok» JShS eńbek etedi. Sharýashylyqty aýyl týmasy, kásipker Qaırat Jánibekov basqarady. Ýspen aýyldyq okrýginiń ákimi Saragúl Beısebaevanyń aıtýynsha, munda tártip pen eńbekqorlyq birinshi orynda. Onyń kóshelerdiń tazalyǵynan, halyqtyń kóńil kúıinen-aq baıqaýǵa bolady.
SQO polıtsııa departamentiniń málimetinshe, 2021 jyldan bastap oblysta ishimdik tutynýdan tolyq bas tartqan eldi mekender sany artyp keledi. Búginde mundaı 13 aýyl bar jáne olardyń eshqaısysynda sońǵy 5 jylda qylmys tirkelmegen.
Buǵan deıin Pavlodar oblysynda 16 aýyl ishimdikten bas tartqanyn jazǵan edik.