SQO-da sý tasqynynan zardap shekkenderdiń bárine kómek kórsetildi

ASTANA. KAZINFORM – Petropavlda sý tasqynynan zardap shekkender úshin jańa shaǵynaýdan salyndy. Búgin Soltústik Qazaqstan oblysynyń ákimi Ǵaýez Nurmuhambetov tabıǵı apat saldary qalaı qalpyna keltirilgenin aıtyp berdi.

Ákimniń aıtýynsha, oblysqa 3,5 mlrd tekshe metr qyzyl sý keldi, óńirdiń ınfraqurylymy barshama zardap shekti. Turǵyndardyń úılerine zaqym keldi. 4 myńǵa jýyq úıdi sý basty, onyń jartysy Petropavl qalasynda edi.

«Oblys turǵyndary ózderin naǵyz patrıot retinde tanytty, qıyn sátte búkil el kómegin aıamady. Tótenshe jaǵdaıdyń alǵashqy kúnderinen bastap, áskerıler, qutqarýshylar, polıtseıler men qarapaıym adamdar sý tasqynymen kúresti. Olar transheıa qazyp, ınertti materıaldardan qaptar ázirledi, bógetterdi nyǵaıtyp, aýyldardy tazartyp, zardap shekkenderge qoldaý kórsetti. Memleket basshysy oblysymyzǵa saparynda joǵary aýyzbirshilikti atap ótip, tabıǵı apatpen kúreske atsalysqan barsha azamatqa alǵysyn bildirdi», - dedi óńir ákimi Astanada Ortalyq kommýnıkatsııalar qyzmetinde ótken baspasóz máslıhatynda.

Soltústik Qazaqstan oblysy ákiminiń aıtýynsha, tabıǵı apattan zardap shekken úılerdi qalpyna keltirý jáne azamattardy qalypty ómirge qaıtarýda memleket óz mindetterin tolyq oryndady.

«Aqshalaı ótemaqy tolyq kólemde tólendi. Ýáde bergenimizdeı, barlyǵy baspana aldy. Bul rette Prezıdent úndeýine qulaq asyp, soltústikqazaqstandyqtardyń baspana alýyna qarajat bólgen metsenattar bar. Osylaısha, Petropavlda jańa «Birlik» shaǵynaýdany salyndy, onda qazir 700 otbasy turyp jatyr. Balabaqsha ashylyp, mektep salý josparlanǵan», - deıdi Ǵ. Nurmuhambetov.

Odan bólek, sý tasqynynan zardap shekkender úshin 1 394 páter satyp alyndy. Barlyq aýdandarda brıgadalar jazǵy kezeńde 241 úıdi qalpyna keltirip, 2 myńnan astam apatty úıdi qıratty. Menshik ıeleri 1 658 úıdi óz betinshe jóndegen. Zardap shekken árbir turǵynǵa jóndeýge ótemaqy tólengen.