SQO-da paramen ustalǵan 2 sheneýnik pen kásipker sottaldy

PETROPAVL. KAZINFORM – Soltústik Qazaqstan oblysynda Taıynsha aýdany ákiminiń orynbasary jáne turǵyn úı-kommýnaldyq sharýashylyǵy bóliminiń basshysy para alǵany úshin sottaldy. Olarǵa para bergen jeke kásipker de jazasyz qalmady.

SQO soty baspasóz qyzmetiniń málimetinshe, sheneýnikter osy jyldyń mamyr aıynda ustaldy. Sol kezde aýdan ákiminiń mindetin atqarǵan Erkebulan Dúısembın jáne bólim basshysy Dmıtrıı Rýdenko «Kompanııa «MegaStroıInvest» JShS jáne «VTV-Taıynsha» JShS ókili Vage Akopıannan para alǵan. Sheneýnikter atqarylǵan jumys aktisine kedergisiz qol qoıýdy 10 mln teńgege baǵalaǵan. 
2 mamyr kúni Rýdenko 5 mln teńge, kelesi kúni qalǵan somany alǵan. Sottalǵandardyń kinási tolyq dáleldendi. Desek te úkim shyǵararda olardyń kishkentaı balalarynyń barlyǵyn eskerdi.
Petropavl qalalyq soty E.Dúısembındi QR QK 366 babynyń 3 bólimi 2 tarmaǵy boıynsha 7,6 jylǵa bas bostandyǵynan aıyrdy. Ol jazasyn qylmystyq-atqarý júıesiniń qaýipsizdigi ortasha mekemesinde óteıdi.
D.Rýdenko da osy bap boıynsha sottalyp, jeti jylǵa bas bostandyǵynan aıyryldy. Eki sheneýnik te ómir boıyna memlekettik qyzmette jumys isteý quqyǵynan aıyryldy.
Al para bergen kásipker V.Akopıan QR QK 367 babynyń 2 bólimi boıynsha kináli dep tanylyp, 3,6 jylǵy sottaldy.
Sot úkimi ázirge zańdy kúshine engen joq.
Buǵan deıin SQO joldarynda qysta 200-den astam jylytý beketi jumys isteıtinin jazǵan edik.