SQO-da órt qaýipsizdigi talaptaryn buzǵan aýyl ákimdigi aıyppul tóledi
PETROPAVL. KAZINFORM — Soltústik Qazaqstan oblysynda tabıǵı aýmaqtarda órt shyǵý jaǵdaılary jıilep otyr.
SQO Tótenshe jaǵdaılar departamentiniń málimetinshe, bıyl orman sharýashylyqtary aýmaǵynda jeti orman órti shyqty. Byltyr bul ýaqytta mundaı fakti tirkelmegen.
— Órttiń shyǵýyna bireýlerdiń qaýipsizdik erejelerin saqtamaýy jáne orman alqaptarynyń aınalasynda mıneraldanǵan jolaqtar — jyrtylǵan qorǵanys beldeýleriniń joqtyǵy sebep bolǵan. Sonymen qatar qurǵaq shóp pen qamystyń janýynyń 172 deregi tirkelip, 77 gektar aýmaqty ot sharpydy. Qaza tapqandar men zardap shekkender tirkelgen joq, — deıdi departament bastyǵy Jomart Asqarov.
Osyǵan oraı baqylaý kúsheıtildi. Qazir oblysta 359 adamnan turatyn 55 mobıldi top qurylǵan, búginge deıin 143 reıd júrgizildi. Nátıjesinde 93 jeke jáne zańdy tulǵa ákimshilik jaýapkershilikke tartyldy. Onyń ishinde 7 adamǵa 700 myń teńgege jýyq aıyppul salyndy. Bul — ótken jylmen salystyrǵanda 5 esege kóp.
— Qatty turmystyq qaldyqtar polıgondarynyń janýy da ózekti másele bolyp otyr. Sońǵy úsh jylda osyndaı 37 órt tirkeldi. Keıbir qoqys oryndary jaz boıy toqtaýsyz janyp, ekologııaǵa zııan keltirip jatyr. Mundaı órtti sóndirýge keıde eki aptaǵa jýyq ýaqyt ketedi. Bıyldyń ózinde 4 jaǵdaı tirkeldi. Mysaly, Kladbınka aýyly mańynda qoqys órtenip, jalyn qurǵaq shópke taraǵan. Qaýipsizdik talaptaryn buzǵany úshin aýyl ákimdigine 432 500 teńge aıyppul salyndy, — deıdi Jomart Asqarov.
SQO-da órt qaýipsizdigine qatysty taǵy bir másele — órt gıdranttarynyń isten shyǵýy.
— Óńirde 5 myńǵa jýyq órt gıdrantynyń 648-i nemese 13% jaramsyz kúıde. Sonymen qatar sý alý oryndary jetkiliksiz: oblysta tek 1 pırs jáne 45 arnaıy alań bar, al Aqjar, Aqqaıyń, Esil, M. Jumabaev, Mamlıýt, Ǵ. Músirepov atyndaǵy, Shal aqyn jáne Taıynsha aýdandarynda sý alý alańdary men pırster múldem joq, — deıdi departament bastyǵy.
Buǵan deıin QR Tótenshe jaǵdaılar mınıstrligi órt qaýpi joǵary maýsymnyń bastalýyna tabıǵatta jáne sý jaǵasynda qaýipsizdik erejelerin saqtaýǵa shaqyrǵanyn jazǵan edik.
