SQO-da orman órtteriniń aldyn alý sharalary kúsheıtildi

PETROPAVL. KAZINFORM – Soltústik Qazaqstan oblysynda orman órtteriniń aldyn alý maqsatynda órt qaýipti maýsym resmı túrde jarııalandy. 

Bul kezeńde tabıǵat aıasynda qaýipsizdik talaptaryn saqtaý – ár turǵynnyń mindeti. Atalǵan óńirde aýa raıynyń jylynýyna baılanysty órt qaýpi artyp otyr.

SQO Tabıǵı resýrstar jáne tabıǵat paıdalanýdy retteý basqarmasynyń málimetinshe, qystan qalǵan qoqysty jaǵý, egistikter men shabyndyqtarda qurǵaq shópti órteý jaǵdaılary jıileıdi. Bul óz kezeginde órttiń shyǵýyna jáne onyń orman alqaptaryna taralýyna sebep bolady. Sonymen qatar kún jylynysymen turǵyndardyń tabıǵat aıasynda demalyp, ot jaǵýy da qaýip deńgeıin arttyrady. 

Osyǵan oraı, QR Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń buıryǵy shyǵyp, óńirde órt qaýipti maýsym bastaldy.

– Órt qaýipti kezeńde birqatar áreketke qatań tyıym salynady. Atap aıtqanda, sóndirilmegen temeki tuqylyn nemese sirińkeni tastaýǵa, janǵysh materıaldardy qaldyrýǵa, janarmaıdy belgilenbegen jerde quıýǵa, aqaýy bar tehnıkany paıdalanýǵa bolmaıdy. Sondaı-aq orman aýmaǵynda jáne oǵan jaqyn jerlerde shóp, qoqys órteýge, ashyq ot jaǵýǵa qatań tyıym salynady, - deıdi basqarma mamandary.

Óńirde órt jaǵdaıyn baqylaý úshin úsh deńgeıli monıtorıng júıesi — jerústi patrýldeý, beınebaqylaý kameralary jáne ǵaryshtyq monıtorıng jumys isteıdi. Órt qaýipti maýsym bastalǵannan keıin barlyq tıisti qyzmet joǵary daıyndyq rejımine kóship, orman kúzeti kúsheıedi. 

Buǵan deıin Pavlodar ormandarynda órtke qarsy baqylaýǵa drondar jumyldyrylǵanyn jazǵan edik.