SQO-da oraq aldynda dıqandardyń basyn qosqan dástúrli «Dala kúni» merekesi ótti
PETROPAVL. KAZINFORM – Soltústik Qazaqstan oblysynda dástúrli «Dala kúni» merekesi ótip, aýyl sharýashylyǵy salasy mamandaryna zamanaýı tehnıka úlgileri men ınnovatsııalyq ázirlemelerdiń kórmesi usynyldy. Dıqandar tájirıbelik ýchaskelerdi aralap, aýylsharýashylyq keńesine qatysty.
«Dala kúni» merekesiniń maqsaty – fermerlerdi aýyl sharýashylyǵy salasyndaǵy sońǵy jetistiktermen, zamanaýı agrotehnologııalarmen tanystyrý, tájirıbe bólisý. Bul joly dıqandardyń basyn qosqan is-shara Aqqaıyń aýdany Shaǵalaly eldi mekenindegi aýyl sharýashylyǵy tájirıbelik stantsııasynda ótti.
SQO aýyl sharýashylyǵy jáne jer qatynastary basqarmasynyń málimetinshe, is-sharaǵa aýyl sharýashylyǵy vıtse-mınıstri Azat Sultanov, aýdan ákimderi, ǵylymı qoǵamdastyq músheleri, aýyl sharýashylyǵy keńesi, seriktestik basshylary, memlekettik organdar men qarjy ınstıtýttarynyń ókilderi, aýyl sharýashylyǵy ónimderin jetkizýshiler qatysty. Qazaqstandyq kompanııalar jınalǵandar nazaryna jabdyqtary men jınaqtaýyshtaryn usyndy. Sondaı-aq tyńaıtqysh jetkizýshilerdiń qyzmetteri tanystyryldy.
«Memleket basshysy 5 jyl ishinde aýyl sharýashylyǵyndaǵy jalpy ónim kólemin 2 esege arttyrý mindetin qoıdy. Ony oryndaý boıynsha keshendi jumystar júrgizilip jatyr. Egistik ártaraptandyrylyp, maıly daqyldar men jasymyq, qaraqumyq, kartop sııaqty áleýmettik mańyzy bar daqyldar alqaby ulǵaıtyldy. Topyraq qunarlyǵyn arttyrý maqsatynda 257 myń tonna mıneraldy tyńaıtqyshtar engizildi, bul ótken jylmen salystyrǵanda kóp. Sondaı-aq tuqymdy jańartý, aýyl sharýashylyǵy tehnıkalaryn jańǵyrtý júrgizilip jatyr. Memleket tarapynan sharýalarǵa qajetti kómek bar. Bıyl aýyl sharýashylyǵyn sýbsıdııalaýǵa 60 mlrd teńgeden astam qarjy bólindi», - dedi SQO ákimi Ǵaýez Nurmuhambetov.
Sonymen qatar, mereke qonaqtary úshin taqyryptyq fotoaımaq pen kontserttik baǵdarlama, ulttyq oıyndar oınatylatyn sporttyq aımaq uıymdastyryldy.
Bıyl oblys 4,5 mln gektar alqaptan aýyl sharýashylyǵy daqyldaryn jınaýy kerek, onyń 3,4 mln gektary dándi daqyldar, 751 myń gektary maıly daqyldar, 379 myń gektary mal azyǵy, 26 myń gektary kartop jáne 5 myń gektary kókónister.
Dıqandar aldyndaǵy qazir basty mindet – ósirilgen ónimdi ysyrapsyz jınap, saqtap, tuqym qoryn qalyptastyrý. Sondaı-aq, atap aıtqanda, jem-shópti tolyq satyp alý, sharýalardy janar-jaǵarmaımen úzdiksiz qamtamasyz etý jáne elevatorlardyń astyq qabyldaýǵa daıyndyǵyn qamtamasyz etý boıynsha birqatar tapsyrma berildi.
Buǵan deıin SQO-da jańa astyqty qabyldaýǵa elevatorlardyń jetkilikti ekenin jazǵan edik.
