SQO-da mereıtoılyq jyldyń resmı ashylýy ótti

PETROPAVL. QazAqparat – Soltústik Qazaqstan oblysynda Uly dala uldary Shyǵys oıshyly ál-Farabıdiń, uly aqyn Abaı Qunanbaıulynyń, jazýshy Sábıt Muqanovtyń mereıtoılaryn jáne orta ǵasyr memleketi Altyn Ordanyń mereıtoıyn merekeleý resmı túrde bastaý aldy, dep habarlaıdy QazAqparat tilshisi.

Saltanatty is-shara S.Muqanov atyndaǵy oblystyq ǵylymı-ámbebap kitaphanasynda «Uly dalanyń Uly tulǵalary» suhbat alańynan bastaldy. Oǵan tanymal abaıtanýshylar jáne ál-Farabıdiń ǵylymı murasynyń zertteýshileri qatysty.

Oblys ákiminiń orynbasary Rýslan Álishev óziniń alǵy sózinde mereıtoılyq datalardy merekeleý aıasynda is-sharalar tujyrymdamasy ázirlengenin aıtty. Óńirlik jospar boıynsha oblystyq deńgeıdegi 83 jáne aýdandyq deńgeıdegi 250-den astam ár túrli formattaǵy jáne qoǵamdyq mańyzdy sharalar ótpek.

«Olar qoǵamdyq paryzǵa, belsendi azamattyq ustanymǵa, patrıotızmge qurmetpen qaraýdy qalyptastyrýǵa baǵyttalǵan. Óıtkeni, jas urpaqty el taǵdyry úshin jaýapkershilikke úıretý mańyzdy mindetterdiń biri. Bıylǵy jyl biz úshin, Otanymyz úshin, jalpy halqymyzdyń konsolıdatsııasy jyly bolýy kerek», - dedi Rýslan Álishev.

Asa mańyzdy sharalar qataryna qazaq jáne orys drama teatrlarynyń arnaıy qoıylymdary, Reseıde «Abaı jolymen» atty oblystyń mádenıet kúnderi, respýblıkalyq aqyndar aıtysy, «ál-Farabı jáne Abaıdyń murasy. Bilimdi izgilendirý» halyqaralyq forýmy, «ál-Farabı rýhanııaty» atty oqýshylardyń halyqaralyq týrnıri jáne t.b. engen.

SQO ishki saıasat basqarmasynyń málimetinshe, oblystyq kitaphanada Open spase formatynda Abaıdyń murasyn zertteý ortalyǵy ashyldy. Aýdan ortalyqtarynyń jáne bolashaǵy zor aýyl mektepterinde Abaı ortalyqtary ashylǵan. ál-Farabıdiń ıdeıalary negizinde «Mektep - izgilik qalasy retinde» jobasy engizilip jatyr.

M.Qozybaev atyndaǵy Soltústik Qazaqstan ýnıversıteti negizinde Abaıtaný ǵylymı-tanymdyq ortalyǵy qurylyp, Til jáne ádebıet ınstıtýtyna Abaıdyń atyn berý týraly sheshim qabyldandy.

Oblys ortalyǵynyń aıaldamalarynda Abaıdyń shyǵarmalaryna siltemeleri berilgen QR-kodtar ornatylǵan. Abaı jáne ál-Farabıdiń esimderi berilgen kóshelerdi abattandyrý, sondaı-aq ǵımarattardyń qasbetine uly oıshyldardyń ulaǵatty sózderin jazý jáne olardyń portretterin salý boıynsha «Strıt-art» aktsııalaryn ótkizý qarastyrylǵan.