SQO-da maıdangerge Belarýs eliniń medali tabys etildi
PETROPAVL. KAZINFORM — Petropavlda Qazaqstandaǵy Belarýs Respýblıkasynyń elshiligi maıdanger Vasılıı Makıenkony marapattady. Soǵys ardagerine «Belarýsti fashıstik basqynshylardan azat etýge 80 jyl» medali tabystaldy.
Vasılıı Makıenko eki aıdan keıin 99 jasqa tolady. Ekinshi Dúnıejúzilik soǵysqa 17 jasynda attanǵan bozbala Belarýs elin jaýdan azat etýge qatysqan. Jeńisti Kenıgsberg qalasynda qarsy aldy.
«Men 3-shi Belorýs soǵysynda boldym. Áýe-desant áskerinde 5 jyl áskerı qyzmet atqardym. Soǵystan keıin sol elde qalyp, „Krasnyı Oktıabr“ aıaq kıim fabrıkasynda bólim basshysy bolyp eńbek ettim. Sol jaqta úılendim. Keıin ákemniń talap etýimen elge oralyp, úıge belorýs qyzyn ákeldim. Belorýstar óte qaıyrymdy adamdar, men olardy baýyrym dep esepteımin», — deıdi maıdanger.
Elge kelgennen keıin uzaq jyl sýmen qamtamasyz etý kásipornynda jumys istedi. Búgin soǵys ardagerimen kezdesý osy «Esil sý» respýblıkalyq memlekettik kásipornynda ótti. Іs-sharaǵa eńbek ujymy, ardagerler keńesiniń jáne qoǵam ókilderi qatysty.
Jalpy Vasılıı Makıenko 2-dárejeli Otan soǵysy ordenimen, «Kenıgsbergti alǵany úshin», «Germanııany jeńgeni úshin», «Tyń jerlerdi ıgergeni úshin» jáne kóptegen mereıtoılyq medalmen marapattalǵan.
Buǵan deıin SQO-da on aıda turǵyndar ınternet alaıaqtardan 660 mln teńgege zardap shekkenin jazǵan edik.
