SQO-da kóktemgi egis naýqany bastaldy

PETROPAVL. QazAqparat – Soltústik Qazaqstan oblysynda kóktemgi egis naýqany bastaldy. Búginde dıqandar bıylǵa josparlanǵan 4,5 mln ga alqaptyń 70 myń ga dán sińirdi, dep habarlaıdy QazAqparat tilshisi.

SQO aýyl sharýashylyǵy jáne jer qatynastary basqarmasynyń málimetinshe, bıyl egis alqaptarynda 100 % ylǵal jabý jumysy júrgizildi. Bıyl sharýalar 4,5 mln ga dándi daqyldardy egýdi josparlap otyr. Onyń 3,2 mln ga dándi daqyl, 960 myń ga maıly daqyl egilmek. Jemshópke bıyl 353 myń ga alqap bólinse, 34,1 myń ga kartop, 6,2 myń ga kókónis egiledi.

«Bıylǵy erekshelik – qaraqumyq alqaby 3 ese ulǵaıtylyp, aýmaǵy 27 myń ga jetti. Bul ımportty almastyrý maqsatynda qolǵa alyndy. Osylaısha áleýmettik mańyzy bar ónimmen óńirdi tolyq qamtımyz.

Alqaptardy ártaraptandyrý maqsatynda jasymyq 89,9 myń ga, kúnbaǵys – 125,7 myń ga egilmek. Bul - byltyrǵydan kóp», - deıdi oblystyq aýyl sharýashylyǵy jáne jer qatynastary basqarmasynyń baspasóz hatshysy Ásem Aıtýlova.

Óńirde sharýashylyqtar kóktemgi egis naýqanyn bastap, búgingi kúni dıqandar shamamen 70 myń ga nemese bar alqaptyń 1,3 % dán septi.

«Óńirde dándi daqyldardy sebýdiń ońtaıly merzimderi bar. Sharýashylyqtar sony negizge alady. Byltyr da osy ýaqytta kóktemgi egis naýqany bastaldy.

Osy ýaqytqa deıin 40 myń ga jerge dán egildi, 25,8 myń ga - maıly daqyldar, 0,2 myń ga – kartop jáne qalǵanyna jem-shóp sebildi.

Budan basqa 282,5 myń ga 27,7 myń tonna mıneraldy tyńaıtqyshtar engizildi. 56,4 myń ga alqapta egis aldyndaǵy dárilep, óńdeý júrgizildi», - deıdi Ásem Aıtýlova.

Mıneraldy tyńaıtqyshty 3 mln ga alqapqa engizý josparlanǵan, bul maqsatqa 200 myń tonna preparat alynbaq.