SQO-da qyzylshamen aýyrý eki ese azaıdy

PETROPAVL. KAZINFORM — Soltústik Qazaqstan oblysynda jyl basynan beri qyzylshany 19 adam juqtyrdy. Bul ótken jyldyń uqsas kezeńimen salystyrǵanda eki ese az. 

SQO sanıtarııalyq-epıdemıologııalyq baqylaý departamenti basapsóz qyzmetiniń málimetinshe, juqpaly dertti juqtyrǵandardyń jeteýi — Petropavl turǵyny. Sonymen qatar Aqjar aýdanynda — 5, Mamlıýt jáne Ýálıhanov aýdandarynda — 2 jaǵdaıdan, al Qyzyljar, Shal aqyn jáne Ǵabıt Músirepov atyndaǵy aýdandarda bir adamda anyqtalǵan.

Naýqastardyń basym bóligi, ıaǵnı 52% — 5 jasqa deıingi balalar.

Mamandardyń aıtýynsha, syrqattanǵandardyń 89% tolyq vaktsına almaǵan. Ekpeniń bolmaýy qyzylsha juqtyrýda negizgi sebep ekenin taǵy bir ret dáleldeıdi.

Sanıtar dárigerler qyzylsha — aýa-tamshy joly arqyly taralatyn óte juqpaly vırýstyq aýrý ekenin eskertedi. Bul ınfektsııa adam densaýlyǵyna úlken qaýip tóndiredi jáne aýyr asqynýlarǵa ákelýi múmkin. Sonyń ishinde, aýrý mıdyń, ókpeniń jáne ortańǵy qulaqtyń qabynýyna sebep bolýy yqtımal. Keı jaǵdaılarda qyzylsha ólimge de ákelýi múmkin.

Sondaı-aq mamandardyń aıtýynsha, qyzylshany emdeıtin arnaıy dári joq. Aýrýdyń aldyn alýdyń eń tıimdi ári senimdi joly — ýaqytyly vaktsına saldyrý.

Buǵan deıin Almatydaǵy № 36 qalalyq emhananyń ınfektsıonıst dárigeri, medıtsına ǵylymdarynyń kandıdaty Janat Dosbaevanyń aýrýdyń belgilerin qalaı bilýge jáne balany qalaı qorǵaýǵa bolatyndyǵy týraly keńesin jazǵan edik.