SQO-da qyzylshaǵa qatysty jaǵdaı turaqty

PETROPAVL. KAZINFORM – Soltústik Qazaqstan oblysynda qańtar aıynda 12 adamǵa qyzylsha dıagnozy qoıyldy.  

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, byltyr uqsas kezeńde 16 adam qaýipti ınfektsııany juqtyrǵan.

Jalpy 2025 jyly qyzylshamen aýyrýdyń zerthanalyq rastalǵan 70 deregi tirkelse, 2024 jyly 331 adam dáriger kómegine júgingen.

Ádettegideı syrqattanǵandardyń teń jartysy – Petropavl turǵyndary. Sondaı-aq, Mamlıýt jáne Ýálıhanov aýdandarynda 2 adamnan, Ǵabıt Músirepov atyndaǵy aýdan jáne Qyzyljar aýdanynda bir adamda anyqtalǵan.

Mamandardyń aıtýynsha, qyzylsha – aýa-tamshy joly arqyly tez taralatyn, asa juqpaly vırýstyq aýrý. Bul ınfektsııa asa aýyr asqynýlarǵa ákeletindikten qaýipti dertterdiń qatarynda. Sonyń ishinde mıdyń qabynýyna - entsefalıt, ókpeniń qabynýyna, ortańǵy qulaqtyń qabynýyna - otıtke sebep bolýy múmkin. Keı jaǵdaılarda ólimge de ákeledi.

Medıtsınada qyzylshany tolyqtaı emdeıtin arnaıy dári-dármek joq. Sondyqtan bul derttiń aldyn alý úshin ekpe qoıylady. Qazaqstanda qyzylshaǵa qarsy qyzamyq pen epıdemııalyq parotıtke qarsy biriktirilgen vaktsına qoldanylady. Atalǵan vaktsına 10 jyldan astam ýaqyt boıy Ulttyq profılaktıkalyq ekpe kúntizbesi aıasynda 1 jasta jáne 6 jastaǵy balalarǵa salynyp keledi.

Buǵan deıin Sanıtarııalyq baqylaý komıteti elimizde qyzylshanyń qaıta órshýine baılanysty ata-analarǵa úndeý jasap, ekpe alýǵa shaqyrǵanyn jazǵan edik.