SQO-da keıingi tórt jylda «Ańsaǵan sábımen» 334 bala ómirge keldi

PETROPAVL. KAZINFORM – Soltústik Qazaqstan oblysyna bıyl «Ańsaǵan sábı» memlekettik baǵdarlamasyn iske asyrýǵa 174 kvota bólindi. 

Memlekettik qoldaýdyń arqasynda bedeýlik dıagnozy qoıylǵan kóptegen otbasy ata-ana atanyp, kópten kútken sábılerin baýyryna basyp otyr.

SQO perınataldyq ortalyqtyń málimetinshe, bul ótken jylmen salystyrǵanda 64-ke artyq. Byltyr óńirge 110 kvota berilgen edi. 

Jalpy, mamandardyń aıtýynsha, baǵdarlama jaqsy nátıje kórsetip keledi. Máselen 2021 jyly 217 kvota bólinse, sonyń 110-y oń nátıje berdi. 2022 jyly óńirge 201 kvota berilip, 70 erli-zaıypty kópten kútken sábıin baýyryna basty. 2023 jyly 190 kvotanyń 89-y, 2024 jyly 169 kvotanyń 65-i nátıjeli boldy. Bes jylda oblysqa 887 kvota berilip, nátıjesinde 334 sábı dúnıege keldi.

Dárigerlerdiń aıtýynsha, bul – baǵdarlamanyń áleýmettik mańyzdylyǵy men tıimdiliginiń aıqyn kórsetkishi. Ásirese ekstrakorporaldy uryqtandyrý sııaqty kúrdeli emsharalar memleket esebinen júrgizilýi – kóptegen otbasy úshin úlken múmkindik.

Qazirgi tańda SQO perınataldyq ortalyǵy barlyq qajetti medıtsınalyq emsharalardy ótkizýge tolyq daıyn. Zamanaýı medıtsınalyq qural-jabdyqtarmen qamtylǵan mekemede tájirıbeli reprodýktologtar, akýsher-gınekologtar jáne genetık dárigerler turaqty túrde qabyldaý júrgizedi. 

Buǵan deıin Ekibastuzda týǵanyna 19 kún ǵana tolǵan sábı anasynan ajyratylǵanyn jazǵan edik.