SQO-da qazaq-qytaı ǵylymı-zertteý ortalyǵy ashylady
PETROPAVL. KAZINFORM – Soltústik Qazaqstan oblysynda agrarlyq salada ǵylym men óndiristi ushtastyrǵan jańa joba júzege aspaq.
Byltyr qarasha aıynda SQO delegatsııasynyń Qytaı Halyq Respýblıkasyna saparynda yntymaqtastyq týraly memorandýmǵa qol qoıyldy. Endi Qytaı jaǵy Qazaqstanǵa is-saparmen kelip otyr. Sapar barysynda qonaqtar jergilikti bılik ókilderimen jáne aýyl sharýashylyǵy óndirýshilerimen kezdesti, ýnıversıtettiń zerthanalyq jabdyqtarymen tanysty jáne óńirdiń agrarlyq kásiporyndaryn aralady.
Qozybaev ýnıversıteti men Henan aýylsharýashylyq ınvestıtsııalyq tobynyń birlesken jobasy Qazaqstannyń aýylsharýashylyǵy salasyna tyń serpin berýdi maqsat etken. Zamanaýı ınfraqurylymǵa, ozyq tehnologııalar men mamandardy daıarlaýǵa negizdelgen ol aýylsharýashylyq sektorynda óndiristen bastap óńdeýge jáne satýǵa deıin keshendi sheshimder usynbaq.
Qytaıdyń eń iri aýylsharýashylyq ınvestıtsııalyq kompanııalarynyń biri sanalatyn Henan aýylsharýashylyq ınvestıtsııalyq toby jobaǵa shamamen 5 mln dollar quıyp, jabdyqtarymen, zertteýlerimen jáne saraptamalyq áleýetimen kiredi. Sondaı-aq tuqym materıalyn usynyp, zamanaýı jataqhanalar, zerthanalar ashýdy josparlaǵan.
– Astanadaǵy aýylsharýashylyǵy qyzmetkerleriniń ekinshi forýmynda Qasym-Jomart Toqaev, agroónerkásiptik keshendi odan ári damytý qajettigin atap ótip, salanyń tıimdiligin arttyrý jáne eldiń azyq-túlik qaýipsizdigin nyǵaıtý baǵytynda birqatar mindet júktedi.
Qazaqstan-Qytaı ǵylymı aýyl sharýashylyǵy ortalyǵyn iske qosý nátıjesinde dándi, maıly daqyldardy, burshaq tuqymdastardy jáne jemshópterdi irikteý boıynsha zertteýler men demonstratsııalyq jobalardy júzege asyrýǵa bolady. Negizgi maqsat – aýyl sharýashylyǵyn klımattyq ózgeristerge beıimdeý, daqyldar men topyraq qunarlylyǵyn baqylaýda tsıfrlandyrýdy engizý, protsesterdi tsıfrlandyrý, ónimdilikti boljaýda jasandy ıntellekt pen ushqyshsyz ushý apparattaryn paıdalaný, - deıdi Qozybaev ýnıversıtetiniń rektory Erbol Isaqaev.
Ýnıversıtettiń málimetinshe, qazirdiń ózinde bul maqsatqa SQO ákimdigi 30 ga tájirıbelik jer bóldi. Jobaǵa sheteldik ǵalymdarmen birge ýnıversıtettiń oqytýshylary men stýdentteri tartyldy.
– Joba tájirıbelik alańdardy, zerthanalardy, zamanaýı ınfraqurylymdy qurýdy kózdeıdi. Bul turaqty, eksportqa baǵyttalǵan aýyl sharýashylyǵy platformasyn qalyptastyrýǵa jáne tuqym óndirisiniń egistik alqaptaryn 1 myń gektarǵa deıin keńeıtýge múmkindik beredi dep úmittenemiz. Yntymaqtastyqty uzaq merzimdi strategııalyq seriktestik retinde qarastyramyz, - deıdi Erbol Isaqaev.
Buǵan deıin agrarlyq saladaǵy negizgi kapıtalǵa quıylǵan ınvestıtsııa 790 mlrd teńgege jetkenin jazǵan edik.