SQO-da qar jaýyp, boran soǵyp tur
PETROPAVL. KAZINFORM – Soltústik Qazaqstan oblysynda kún sýytty. Túnimen jaýǵan qardyń arty boranǵa ulasty. Sınoptıkter mundaı aýa raıy áli bir-eki kún saqtalatynyn aıtady.
«Qazgıdromet» RMK SQO fılıaly 9 qazannan beri qar, boran, kóktaıǵaq jaıly eskertip jatyr. Qazirgi ýaqytta oblys batys tsıklonynyń áserinde. Mundaı qolaısyz aýa raıy erteń de saqtalady.
Boljam boıynsha búgin óńirdiń batys, soltústik jáne shyǵysynda jańbyr, qar jaýady. Soltústik shyǵystan soqqan jeldiń ekpini 15-20 m/s, keıde 23-28 m/s deıin jetpek. Al oblystyń soltústigi men shyǵysynda daýyl turyp, ekpini 30 m/s jetedi.
Túnde aýa temperatýrasy -5 gradýsqa deıin tómendese, kúndiz +2-3 aralyǵynda bolmaq. Erteń 12 qazanda da oblystyń soltústigi, shyǵysy men ońtústiginde qar jaýyp, boran saqtalady. Kóktaıǵaq bolmaq. Túnde aýa temperatýrasy -2,-7 gradýs aralyǵynda, kúndiz -5 gradýsqa deıin sýytady.
Bir túnde jaýǵan jaýyn-shashyn mólsheri 3,2 mm deıin jetti. M.Jumabaev aýdanynyń Vozvyshenka, Esil aýdanynyń ıAvlenka meteorologııalyq stansasynda muzdy jaýyn jaýdy. Jalpy, qazan aıyndaǵy jaýyn-shashynnyń ortasha normasy – 22-40 mm.
Buǵan deıin elimizdiń basym bóliginde kúnniń buzylatynyn jazǵan edik.
