SQO-da qant pen birqatar kókónis arzandady

PETROPAVL. KAZINFORM – Soltústik Qazaqstan oblysynda qazan aıynda ınflıatsııa jyldyq esepteýmen alǵanda 9% jetti. Baǵa ótken jyldyń qazan aıymen salystyrǵanda azyq-túlik taýarlaryna – 5%, azyq-túlik emes taýarlarǵa – 9%, aqyly qyzmetterge – 14% ósti.

Ulttyq statıstıka bıýrosynyń SQO boıynsha departamentiniń málimetinshe, bir jyl ishinde jumyrtqa – 14%, nan – 10, tuzdalmaǵan sary maı – 8, toqash jáne unnan daıyndalǵan kondıter ónimderi – 8, et – 3% qymbattaǵan. Al jarmalardyń baǵasy 29%, qant shamamen 2% tómendedi.

Byltyrǵy qazannan osy qazan aıy aralyǵynda kókónisterge baǵa 2% ósti, sonyń ishinde qyzanaqqa – 32%, qııarǵa – 21% qymbattap otyr, biraq qyzylsha – 28%, qyryqqabat – 21, sábiz – 14, pııaz 11% arzandady.

Jeke bas tutynýǵa arnalǵan taýarlar men prıborlar – 12, farmatsevtıkalyq ónimder – 9, kıim jáne aıaq kıim – 9, jýý jáne tazalaý quraldary – 9, kitaptar men keńse taýarlary shamamen 8% qymbattaǵan. Qazirgi ýaqytta suranysqa ıe kómir baǵasy bir jyl ishinde 16% artqan.

Baılanys qyzmetterine baǵa 10% ósti, onyń ishinde uıaly baılanys qyzmeti 27% qymbattady. Internet jelisin qosý úshin tólenetin abonenttik tólem 8% artty.

Qoǵamdyq tamaqtandyrý oryndary da óz qyzmetterin 15% qymbattatqan. Demalys, oıyn-saýyq jáne mádenıet salasyndaǵy qyzmetter quny 10% ósti.

Kólik qyzmetteri 10% qymbattady, sonyń ishinde poıyz bıletteri – 20%, avtomobıl jolaýshylar kóligi qyzmetteri - 5% ósti.

Shashtaraz jáne jeke qyzmet kórsetý mekemeleri de qyzmetterine baǵany 22% ósirdi.

Buǵan deıin SQO-da azyq-túlik baǵasyn mólsherden tys ósirgender jazalanǵanyn jazǵan edik.