SQO-da ımamdar attestatsııadan ótip jatyr
Qazaqstan musylmandary dinı basqarmasynyń ókilderi Qyzyljar ortalyq meshitinde oblystyń 100-ge jýyq ımamynan synaq aldy. Maqsat – din qyzmetkerleriniń bilimin arttyrý. Bes jylda bir ret ótetin attestatsııany ótkizýge Petropavlǵa bas múftıdiń keńesshisi Baltabaı Mekejanov keldi.
«Din qyzmetkerlerin qazirgi atqaryp otyrǵan qyzmetine laıyqtylyǵyn, bilim deńgeıiniń kórsetkishin anyqtamaqpyz. Kemshin tustary bolsa ony joıýǵa kómektesemiz, bilimderin jetildirý úshin arnaıy oqý oryndaryna jiberemiz. Attestatsııadan súrinbeı ótken tájirıbeli ımamdardy yntalandyryp, joǵarylatý maqsatynda basqa laýazymdarǵa aýystyramyz», - deıdi Baltabaı Mekejanov.
Imamdardyń zań boıynsha, ıslam tarıhy, fıqh, aqıda, QMDB-nyń basty 4 qujaty boıynsha bilimderi saralandy. Bıylǵy ereksheligi – din qyzmetkerleri kompıýter arqyly da attestatsııadan ótti.
«Zaman damyp kele jatyr, sondyqtan da tek dinı bilimmen shektelip qana qoımaı, zaıyrly bilimdi de alýǵa yntalandyramyz. Oǵan jón silteımiz. Imamdarymyz jan-jaqty bolýy tıis. Bıylǵy attestatsııanyń ereksheligi ımamdarymyz test tapsyrdy. 60 suraqqa jaýap berdi», - dedi bas múftıdiń keńesshisi.
SQO-da qazirgi ýaqytta 70-ke jýyq meshit bar bolsa, onda 100-den astam ımam eńbek etip jatyr. Attestatsııanyń qorytyndysy boıynsha olardyń jeteýi bilimderin dáleldeı almady.
