SQO-da egin egý naýqany aıaqtaldy

PETROPAVL. KAZINFORM – Soltústik Qazaqstan oblysynda kóktemgi egis naýqany aıaqtaldy. Bıyl óńir dıqandary 4,5 mln ga alqapqa daqyl ekti. Bul – byltyrǵy egistik aýmaǵymen birdeı. 

SQO aýyl sharýashylyǵy jáne jer qatynastary basqarmasynyń málimetinshe, osy jyly sharýashylyqtar 3,4 mln ga dándi, 751 myń ga-ǵa maıly daqyl septi. Sondaı-aq, 379 myń ga-ǵa jem-shóp, 26 myń ga-ǵa kartop, 5 myń ga-ǵa kókónis ekti.

«Óńirde dándi daqyldardy sebýdiń ońtaıly merzimi bar. Jaýyn-shashynǵa qaramastan dıqandar bul jumysty ýaqytynda aıaqtap otyr. Bıyl sortty jańartý kórsetkishi 10% jetkizildi. Jaqsy ónim alý maqsatynda 3 mln ga alqapqaa 256,6 myń tonna mıneraldy tyńaıtqysh engizý josparlanǵan.

Byltyrǵy kúzdegi jaýyn-shashyndy jáne bıylǵy tasqyndy eskerip, dıqandarǵa qazaqstandyq zaýyttar mıneraldy tyńaıtqysh baǵasyn bólip tóleýge múmkindik berip otyr. Qazir 60% tólese, qalǵanyn kúzde, egin jınaǵannan keıin bere alady. 

Naýqanǵa lıtri 250 teńgeden arzandatylǵan janar-jaǵarmaı berildi. Merziminde aıaqtaýǵa ártúrli modıfıkatsııadaǵy 12,7 myń traktor, 14 myń astyq sepkish, 1,5 myń zamanaýı joǵary ónimdi egis keshenderiniń septigi tıdi», - deıdi vedomstvonyń basshysy Meıram Meńdibaev.

SQO-ǵa memleket aýyl sharýashylyǵy salasyn damytýǵa 60,8 mlrd teńge bóldi, onyń 20,4 mlrd teńgesi ósimdik sharýashylyǵyna jumsalady.

Buǵan deıin Petropavlda sý astynda qalǵan 2 myńnan astam úıdiń 1600-ge jýyǵy súriletindigin jazǵan edik.