SQO-da byltyr ınternet alaıaqtar turǵyndardy 1,4 mlrd teńgege aldaǵan

PETROPAVL. KAZINFORM — Soltústik Qazaqstan oblysynda ótken jyly ınternet alaıaqtar keltirgen shyǵynnyń shamamen 38% ǵana qaıtarý múmkin bolǵan.

SQO Polıtsııa departamentiniń bastyǵy Abaı Júsipov turǵyndar aldynda esep berdi. Sońǵy on jyl boıy tirkelgen qylmystar sany azaıyp keledi.

Alaıda kıberqylmystar búginde ózekti máselelerdiń birine aınalǵan. 

— Ótken jyldyń qorytyndysy boıynsha, óńirde kıberqylmystardan jalpy 1 mlrd 401 mln teńge shyǵyn keldi. Onyń ishinde 526 mln 875 myń teńge ǵana qaıtaryldy. Byltyr oblystyq «CyberPol» qyzmetkerleri eki uıymdasqan qylmystyq toptyń qyzmetin toqtatty. Ár topta 5 dropovod bolǵan. Olardyń jalpy somasy shamamen 400 mln teńge bolatyn 56 ınternet alaıaqtyq deregine qatysy bary anyqtaldy, — deıdi Abaı Júsipov.

Vedomstvo bastyǵynyń aıtýynsha, qylmyskerlerden 14 sım-boks, 3 sım-bank jáne ártúrli operatorlarǵa tıesili 35 myń sım-karta tárkilendi. Bul qurylǵylar respýblıka aýmaǵynda azamattardy aldaý úshin paıdalanylǵan.

— Qazir alaıaqtar ınternet arqyly aldaýdyń túrli tásilderin qoldanyp, kún saıyn jańa shemalar oılap taýyp jatyr. Eń keń taralǵan túrleri — ınternettegi habarlandyrýlar arqyly taýar nemese qyzmet úshin aldyn ala nemese tolyq tólem alý; ártúrli «jobalarǵa», ınvestıtsııalarǵa, bás tigýge qarjy saldyrý arqyly aldaý; azamattardyń jeke derekterin ıemdený maqsatynda fıshıngtik siltemelerdi paıdalaný. Alaıaqtyqtyń eń jıi kezdesetin túri — qylmyskerlerdiń telefon arqyly habarlasyp, ózderin bank qaýipsizdik qyzmetiniń nemese quqyq qorǵaý organdarynyń qyzmetkerleri retinde tanystyrýy. Eshqashan bank kartasynyń derekterin, sondaı-aq jeke basyńyzǵa qatysty málimetterdi bógde adamdarǵa aıtpańyz, — deıdi departament bastyǵy.

Buǵan deıin SQO-da jyl basynan beri ınternet alaıaqtyqtyń 110 deregi tirkelgenin jazǵan edik.