SQO-da bıyl jeti aýyl kartadan joıylýy múmkin
PETROPAVL. KAZINFORM — Soltústik Qazaqstan oblysynda 635 aýyl bolsa, sonyń 141-inde halyq sany elýge jetpeıdi. Bıyl jeti eldi meken kartadan múlde joıylýy yqtımal.
SQO aýyl sanynyń kóptiginen el boıynsha birinshi orynda tur. Alaıda birer jylda óńir bul ereksheliginen aırylyp qalýy múmkin. Aýyldardan adamdar kóship jatyr. Oblys ákiminiń orynbasary Qanat Dúzelbaevtyń aıtýynsha, oblysta qazir 45 eldi mekende turǵyndar sany 10-ǵa jeter-jetpes. Jeti aýyl múlde turǵynsyz qalǵan.
«Aýyl» sanatyndaǵy keıbir eldi mekender boıynsha sáıkessizdik bar. Ákimshilik-aýmaqtyq qurylymdy retteıtin zańnamaǵa sáıkes, aýyl sanalýy úshin halyq sany keminde 50 adam bolýy qajet. Sondyqtan talapqa saı kelmeıtin eldi mekender ydyratylyp joıylýy kerek. Búginde aýyldardy reformalaý boıynsha jumystar júrgizilip jatyr, bul sapaly basqarýǵa jáne bıýdjet qarajatyn neǵurlym bolashaǵy bar eldi mekenderge shoǵyrlandyrýǵa kómektesedi», — deıdi Qanat Dúzelbaev.
Aýylda ómir súrý sapasyn jaqsartý, aýyldyq jerlerde ınfraqurylymdy jańartý maqsatynda Memleket basshysynyń tapsyrmasyna sáıkes «Aýyl — el besigi» jobasy júzege asyrylyp keledi. Oblys ákimi orynbasarynyń aıtýynsha, 2019-2023 jyldary osy baǵdarlama aıasynda bolashaǵy zor 116 aýyldyń 37,4 mlrd teńgege áleýmettik ınfraqurylymy jańǵyrtyldy.
Bıyl 59 aýylda 77 jobany iske asyrýǵa shamamen 14 mlrd teńge bólindi. Nátıjesinde aýyldardyń 160 myńnan astam turǵynynyń turmystyq jaǵdaıy jaqsardy, 1,1 myńnan astam jumys orny quryldy.
Jalpy 2027 jylǵa deıin jyl saıyn keminde 50 aýyldy jańǵyrtý josparlanǵan.
Buǵan deıin SQO ózin azyq-túlikpen tolyq qamtı almaı otyrǵanyn jazǵan edik, saldarynan jylda ımporttan shamamen 65 mlrd teńge joǵaltady.
