SQO-da bıyl óndiriste 8 adam mert bolǵan

Soltústik Qazaqstan oblysynda jyl basynan óndiriste 21 oqys oqıǵa tirkeldi, saldarynan 8 adam qaza tapsa, 16-sy túrli jaraqat aldy, dep habarlaıdy QazAqparat tilshisi.

SQO memlekettik eńbek ınspektsııasy basqarmasynyń málimetinshe, jumys ornynda zardap shekkenderdiń 11-iniń jaraqaty aýyr bolǵan, úsheýinde ortasha, ekeýi jeńil jaraqat aldy.

Byltyr osy kezeńde 24 oqys oqıǵa tirkelip, 30 adam zardap shekti.

Bıyl mert bolǵandardyń ekeýin tok soqqan. Tórt adam bıyl tamyz aıynda Taıynsha aýdanyndaǵy shoshqa kesheninde qaza tapty.   

«Elektr togy soǵyp Jambyl aýdanyndaǵy «Shatılo ı K» JShS jumysshysy jáne «NTS-Beton» JShS kólik júrgizýshisi mert boldy. Petropavl metallqurylǵylary zaýytynda kópirli krannyń mashınısti joǵarydan qulap ketken. Sot ótip, ınspektsııa jeńip shyqty. Jumys berýshiniń kinási 75 % dáleldendi. Oqys oqıǵa jeltoqsan aıynda bolǵanymen, jumysshynyń qurylysta qaza tabýyna baılanysty akt tek shilde aıynda ǵana jasaldy. Sot otyrystary ótti. «Qurylys servıs» JShS tas qalaýshynyń kelisim boıynsha jumys istegenin aıtty, biraq ınspektsııa eńbek qatynasy bolǵanyn dáleldedi», - deıdi basqarmanyń bólim basshysy Azat Kúsherbaev.

Mamannyń aıtýynsha, jumys berýshiniń kinási dáleldengen jaǵdaıda zardap shekken jaq materıaldyq tólem alýǵa quqyly.

Al saqtandyrylǵan jaǵdaıda jumysshy men jumys berýshiniń kinásine qaraı ótemaqy beriledi. Tólemder ujymdyq kelisimshartta da kórsetilgen.

Eger qylmystyq is qozǵalsa, mán-jaıdy polıtsııa anyqtaıdy.